Ekologiya vazirligi chiqindilarni musiqa sadolari ostida olib ketishni taklif qildi

Toshkent, Qashqadaryo va Buxoroda chiqindilarni olib ketishning yangi usuli sinovdan o‘tkazilmoqda.

Ekologiya, atrof-muhitni muhofaza qilish va iqlim o‘zgarishi vazirligi chiqindilarni mumtoz musiqa sadolari ostida olib ketishni sinovdan o‘tkazayotganini ma’lum qildi.

Qayd etilishicha, chiqindi tashuvchi mashinalarning ertalab baland ovozda signal chalib kelishi aholining e’tirozlariga sabab bo‘lgan. Shu sababli, chiqindilarni signal usulida emas, yengil musiqa sadolari ostida olib chiqish yo‘lga qo‘yilgan.

«Hozir Toshkent, Qashqadaryo va Buxoro viloyatlarida bu usul tajribadan o‘tkazilmoqda. Har bir hududga bittadan maxsus mashina ajratilib, aholiga chiqindi tashuvchi mashina kelgani haqida baland signal emas, musiqa orqali xabar berilmoqda», deyiladi xabarda.

Agar yangi usul sinovdan muvaffaqiyatli o‘tsa, keyinchalik butun respublika bo‘yicha joriy qilinishi mumkin.