Ona va bola salomatligi markazining hududiy filiallarida qanday tibbiy xizmatlar ko‘rsatiladi?

Xavf omillari aniqlangan ayollar tibbiy tekshiruvdan o‘tkaziladi, davolanadi hamda zarur hollarda respublika darajasidagi tibbiyot muassasalariga yo‘naltiriladi.

Prezident qaroriga muvofiq yangi tashkil etiladigan Respublika ixtisoslashtirilgan ona va bola salomatligi ilmiy-amaliy tibbiyot markazining Qoraqalpog‘iston Respublikasi, viloyatlar va Toshkent shahridagi hududiy filiallarida qator xizmatlar ko‘rsatiladi.

Sog‘liqni saqlash vazirligi xabariga ko‘ra, bunda, xavf omillari aniqlangan ayollar tibbiy tekshiruvdan o‘tkaziladi, davolanadi hamda zarur hollarda respublika darajasidagi tibbiyot muassasalariga yo‘naltiriladi.

Shuningdek, filiallarda quyidagi tibbiy xizmatlar ko‘rsatiladi:

• nikohlanuvchilar, homilador va tug‘ish yoshidagi ayollar hamda chaqaloqlarni molekulyar tibbiy-genetik tekshiruvlar o‘tkazish;
• irsiy kasalliklar aniqlangan bolalarni maxsus dori vositalari va oziq-ovqat mahsulotlari bilan ta’minlash;
• sog‘lom oilani rejalashtirish hamda istalmagan homiladorlikning oldini olish chora-tadbirlarini amalga oshirish.

Respublika perinatal markazi:

• erta tug‘uruq xavfi bo‘lgan homiladorlarga, shuningdek, muddatiga yetmasdan (22-28 haftalik) tug‘ilgan chaqaloqlarga barcha turdagi tibbiy xizmatlar ko‘rsatadi;
• alohida tibbiy ko‘rsatmalarga asosan homiladorlar va chaqaloqlarga markazning hududiy filiallarida konsultativ yordam beradi hamda zarur hollarda ularga tibbiy statsionar yordam ko‘rsatadi.