G‘azodagi uylarning qariyb 30 foizi vayron bo‘ldi yoki yashashga yaroqsiz holga keldi - BMT

G‘azo sektori 10 kundan buyon elektr energiyasidan butunlay uzilgan, kasalxonalar bemorlarga to‘lib ketgan. 7 oktyabrdan buyon berilayotgan aviazarbalar oqibatida sektordagi uylarning qariyb 30 foizi vayron bo‘lgan yoki yashashga yaroqsiz holga kelgan.

Foto: Shbair / AP / Scanpix / LETA

Isroil G‘azoga aviazarbalar berishda davom etmoqda. Natijada yuzlab insonlar ochiq osmon ostidagi qopqonda qolgan. Bu haqda BMT boshqarmasi hisobotida gap boradi.

“Asosiy qismi Falastin fuqarolik mudofaasidan iborat qutqaruv guruhlari yoqilg‘i va texnikalar yetishmasligi, aloqaning cheklangan sharoitlarida, shuningdek doimiy aviazarbalar ostida bor kuchi bilan o‘z vazifasini bajarishga harakat qilmoqda.

Ba’zi kasalxona binolari butunlay yo‘qolib ketish arafasida, ba’zilari jarohatlanganlar bilan to‘lib ketgan. Bunday holatda 9 ming atrofidagi saratonga chalingan kasallar yagona kimyoviy davolash imkoniyati mavjud kasalxonada yetarlicha davolana olmayapti”, — deyiladi Birlashgan Millatlar Tashkilotining Humanitar masalalarni muvofiqlashtirish boshqarmasi xabarida.

G‘azo sektori 10 kundan buyon elektr energiyasidan butunlay uzilgan.

BMT boshqarmasining G‘azo uy-qurilish vazirligiga tayanib ma’lum qilishicha, 7 oktyabrdan buyon sektordagi uylarning qariyb 30 foizi vayron bo‘lgan yoki yashashga yaroqsiz holga kelgan.

Tayyorlagan Фаррух Абсаттаров

#BMT #Isroil #G‘azo sektori

2023 yil 7 oktyabr kuni G‘azo bo‘lgasidagi Hamas kuchlari Isroilga yoppasiga raketa zarbalari berib, chegaradagi aholi punktlarini egallay boshladi. Bunga javoban Isroil qo‘shinlari G‘azo bo‘lgasiga bostirib kirdi. Bu safargi eskalatsiya avval kuzatilmagan darajada ko‘p qurbonlarga olib keldi.