Sovuq urgan sabzavotlar iste’molga qanchalik yaroqli ekani haqida ma’lumot berildi

Ular zaharlanishga olib kelmasa-da, barcha foydali xususiyatlarini yo‘qotadi va eriganidan so‘ng, saqlash muddati keskin kamayadi.

Sovuq tushishi oqibatida bozordagi ayrim sabzavot va mevalarni sovuq urishi ehtimoli yuqori. Bu mahsulotlar o‘zining organoleptik xususiyatlari – mazasi, ta’mini yo‘qotadi va iste’molga yaroqsiz hisoblanadi. Bu haqda Sanepidqo‘mita xabar berdi.

Qayd qilinishicha, ushbu mahsulotlarning ozuqaviy qiymati ham pasayadi. Ular zaharlanishga olib kelmasa-da, barcha foydali xususiyatlarini yo‘qotadi va eriganidan so‘ng, saqlash muddati keskin kamayadi.

«Umumiy ovqatlanish korxonalariga qo‘yiladigan sanitariya-gigiyena talablari»ga ko‘ra, muzlab erigan va qayta muzlatilgan oziq-ovqat mahsulotlarini ishlatishga ruxsat berilmagan.

Har bir oziq-ovqat mahsuloti texnik jihatdan tartibga solish hujjatlariga — SanQvaN, GOST (davlat standarti), tashkilot standartiga asosan saqlanishining muayyan talablari belgilangan. Ya’ni, har bir mahsulot qoida va normalarda belgilangan ma’lum harorat va havoning nisbiy namligida saqlanishi lozim.

Tayyorlagan: Сардор Юсупов

#oziq-ovqat #Sanepidqo‘mita