NATO Yevropada so‘nggi o‘n yilliklardagi eng yirik mashqini o‘tkazadi

Yevropadagi NATO ittifoqchi kuchlari bosh qo‘mondoni Kristofer Kavoli so‘zlariga ko‘ra, kelasi haftada alyans so‘nggi o‘n yilliklardagi eng yirik Steadfast Defender 2024 o‘quv mashqlarini boshlaydi. Bu haqda Reuters xabar berdi. 

Tadbir Germaniya, Polsha va Boltiqbo‘yi mamlakatlarida bo‘lib o‘tadi va may oyiga qadar davom etadi. Mashqlarda 90 mingga yaqin askar ishtirok etadi. 

«Alyans Shimoliy Amerikadan kuchlarni transatlantika orqali jo‘natib, Yevro-Atlantika hududini mudofaa qilish salohiyatini namoyish etadi», dedi Kavoli. 

Unga ko‘ra, mashg‘ulotlarda NATO mamlakatlari qurolli kuchlaridan tashqari Shvetsiya harbiy xizmatchilari ham ishtirok etadi. 

Avvalroq, NATO harbiy qo‘mitasi rahbari Rob Bauer Steadfast Defender 2024 mashqlari Rossiyaning NATO sharqiy qanotiga ehtimoliy bosqinini oldini olishga qaratilganini tushuntirgan edi. 2023 yil oktyabr oyida u mashqlarda 40 mingga yaqin harbiy xizmatchi ishtirok etishi kerakligini aytdi. 

Financial Times bayonotiga ko‘ra, rejalashtirilgan tadbir Sovuq Urushdan keyingi eng yirik mashqlar hisoblanadi. NATO harbiylari mashg‘ulotlar davomida 500–700 marta parvoz qiladi va unda kamida 50 ta harbiy kema qatnashadi.