Singapur O‘zbekistonda yangi megazavod qurilishiga 100 mln dollar investitsiya kiritadi

O‘zbekistonning Singapurdagi elchixonasi ko‘magida «Toshkent viloyatida megazavod va distribyutorlik xabini tashkil etish bo‘yicha hamkorlik shartnomasi» imzolandi, deb xabar bermoqda «Dunyo».

Marosimda O‘zbekiston qishloq xo‘jaligi vaziri Ibrohim Abdurahmonov, Toshkent viloyati hokimi Zoir Mirzayev hamda Singapurning Willmar International Limited kompaniyasi direktorlar kengashi raisi Kuok Xun Xong ishtirok etdi.

Loyiha Toshkent viloyatida Willmar International Limited kompaniyasining to‘g‘ridan to‘g‘ri investitsiyasi hisobiga qiymati 100 million dollar bo‘lgan un mahsulotlari, o‘simlik moylari va yuqori oqsilli ozuqalar ishlab chiqaruvchi megazavodni qurishni nazarda tutadi. Loyihaning texnik-iqtisodiy asoslari joriy yilning birinchi yarmida yakunlanadi.

Singapur tomoniga ko‘ra, ushbu zavodning qurilishi O‘zbekistonni Willmar global ta’minot zanjiriga kiritish uchun strategik imkoniyat yaratadi. Distribyutor markazning rivojlanishi esa mamlakatni Markaziy Osiyo, Yaqin Sharq va boshqa mamlakatlar bozorlarining yirik mintaqaviy va global eksportchisiga aylantiradi.

Loyiha temiryo‘l, Toshkent halqa yo‘li va boshqa muhim kommunikatsiyalar yonida strategik ahamiyatga ega bo‘lgan Toshkent viloyati Surum qishlog‘ida 30 gektar maydonda amalga oshirilishi rejalashtirilgan.