AQSh Eronni Kirmondagi bo‘lajak terakt haqida oldindan ogohlantirgan – OAV

AQSh hukumati Eronni 3 yanvar kuni Kirmon shahrida IShID guruhining «Viloyati Xuroson» yacheykasi tomonidan tayyorlanayotgan terakt haqida oldindan ogohlantirgan. Bu haqda AP o‘z manbasiga tayanib yozdi.

Vaziyatdan xabardor bo‘lgan AQSh rasmiysiga ko‘ra, Vashington boshqa har qanday davlat rasmiylarini ehtimoliy tahdidlar haqida ogohlantirishni o‘z burchi deb hisoblaydi. Biroq, u Eron bilan diplomatik aloqalarga ega bo‘lmagan AQSh bu ogohlantirishni mamlakat rasmiylariga qanday yetkazgani haqida ma’lumot bermadi. Eron tomoni ham bu ma’lumotga hozircha izoh bermadi.

2024 yil 3 yanvar kuni Eronning Kirmon shahrida general Qosim Sulaymoniyni xotirlash kunida bir nechta portlashlar sodir bo‘ldi. Oqibatda, 95 kishi halok bo‘ldi. Hodisa uchun javobgarlikni IShID o‘z zimmasiga oldi.