U chorrahada svetoforning qizil chirog‘ida harakatlanib, o‘z yo‘lidan kelayotgan Nexia-2ʼga urilgan.
Jizzax shahrida Damas va Nexia-2 mashinalari o‘zaro to‘qnashgan. Viloyat IIB axborot xizmatining xabar berishicha, hodisa 2024 yil 29 yanvar kuni sodir bo‘lgan.
Jizzax shahri O‘ratepalik mahallasi hududida ikkita ko‘cha kesishmasida Damas va Nexia-2 o‘zaro to‘qnashgan. Oqibatda Nexia-2ʼda yong‘in boshlanib, ko‘p o‘tmay mashina butunlay yonib ketgan.
Dastlabki surishtiruvda Damas boshqaruvida bo‘lgan 22 yoshli yigit hali haydovchilik guvohnomasi olmagani va u svetoforning qizil chirog‘ida o‘tib kelib, Nexia-2 bilan to‘qnashgani aniqlangan.
Qayd etilishicha, Nexia-2 mashinasining haydovchisi va yo‘lovchilariga tez tibbiy yordam ko‘rsatilgan. Ulardan biri shifoxonaga yotqizilgan.
Hozirda holat yuzasidan Jizzax shahar IIB tergov bo‘limi tomonidan surishtiruv harakatlari olib borilmoqda.
