Buxoroda muxbirni pichoqlagan shaxs qo‘lga olindi

Ikki tanish orasida oldindan nizo bo‘lgani ta’kidlanmoqda.

6 fevral kuni Buxoro viloyati, Shofirkon tumanida joylashgan kafeda Taftish axborot agentligining Buxorodagi muxbiri pichoqlandi. Bosh prokuratura xabariga ko‘ra, buni sodir qilgan shaxs qo‘lga olindi.

Qayd qilinishicha, gumonlanuvchi A.A. va jabrlanuvchi O‘.T. orasida avvaldan nizo bo‘lgan. Shu sababli, A.A. kafeda pichoqni O‘.T. qorin qismiga bir marotaba sanchib, tan jarohati yetkazgan.

Holat yuzasidan Shofirkon tumani prokuraturasi tomonidan Jinoyat kodeksining 25, 97-moddasi 1-qismi (Qasddan odam o‘ldirishga suiqasd qilish) bilan jinoyat ishi qo‘zg‘atilib, 7 fevral kuni unga nisbatan «qamoqqa olish» ehtiyot chorasi qo‘llanilgan.

Jabrlanuvchi O‘.T. hozir shifoxonada davolanayotgani ta’kidlanmoqda. Uning ahvoli qandayligi haqida xabarda ma’lumot berilmagan.