O‘zbekistonning Qatardagi elchixonasi ko‘magida energetika vaziri o‘rinbosari Umid Mamadaminov va Al Mirqab Capital kompaniyasi rahbariyati o‘rtasida onlayn muzokaralar tashkil etildi.
«Dunyo» xabariga ko‘ra, veb-uchrashuvda, shuningdek, O‘zbekiston Investitsiyalar, sanoat va savdo vazirligi hamda To‘g‘ridan to‘g‘ri investitsiyalar jamg‘armasi mas’ul xodimlari ishtirok etdi.
Muzokaralar davomida Qatar tomoniga O‘zbekistonda elektr energiyasini ishlab chiqarishda qayta tiklanuvchi manbalardan keng foydalanish va mazkur sohada loyihalarni amalga oshirish uchun yaratib berilgan keng imkoniyatlar to‘g‘risida ma’lumot taqdim etildi.
Uchrashuv doirasida Samarqand viloyati va Qoraqalpog‘iston Respublikasida Qatar kompaniyasining to‘g‘ridan to‘g‘ri investitsiyalarini jalb qilgan holda elektr stansiyalarni barpo etish masalalari batafsil muhokama qilindi.
Muloqot yakunida Al Mirqab Capital kompaniyasiga taklif etilgan loyihalarni amalga oshirish ishlarini boshlash hamda tegishli kelishuvlarni imzolash maqsadida Qatar vakillarining O‘zbekistonga tashrifini amalga oshirishga kelishib olindi.
