Lukashenko 2025 yilgi prezidentlik saylovlarida qatnashadi

Belarus rahbari Aleksandr Lukashenko 2025 yilgi saylovlarda ketma-ket sakkizinchi muddatga prezidentlikka da’vogarlik qiladi. Bu haqda u 25 fevral, yakshanba kuni parlament va mahalliy kengashlarga saylovda ovoz berishdan so‘ng saylov uchastkasida ma’lum qildi. Uning so‘zlariga ko‘ra, G‘arb belaruslarga qanchalik «bosim o‘tkazsa», «ular shunchalik tez saylovlarga boradi». «Dunyoning hech bir joyida Belarusdagidek ochiq, adolatli saylovlar bo‘lmaydi, bu biz uchun bayram», - dedi mamlakat rahbari.

Lukashenko Belarusda deyarli 30 yildan beri hokimiyat tepasida. 2020 yildagi so‘nggi prezidentlik saylovlari arafasida uning raqiblariga nisbatan jinoiy ish ochilgan edi. Xususan, saylov kampaniyasi ishtirokchilari Sergey Tixanovskiy va Viktor Babariko hamon qamoqda. Ovoz berishdan so‘ng mamlakatda ommaviy norozilik namoyishlari bo‘lib o‘tdi, ular hokimiyat tomonidan shafqatsizlarcha bostirildi. 

Lukashenkoning o‘zi 80 foizdan ko‘proq ovoz olganini e’lon qildi va o‘zini mamlakat prezidenti deb e’lon qildi. O‘nlab G‘arb davlatlari uni tan olmadi, ba’zilari esa yangi saylovlar o‘tkazishga chaqirdi.