Zelenskiy Ukrainaning raketasozlikdagi muvaffaqiyatlari haqida ma’lumot berdi

Ukraina Rossiyadan himoyalanish uchun raketalar ishlab chiqarishda muvaffaqiyatga erishdi, dedi prezident Volodimir Zelenskiy 10 aprel, chorshanba kuni kechqurun vatandoshlariga yo‘llagan an’anaviy videomurojaatida. «Seriyali ishlab chiqarish, yangi raketa modellari. Tafsilotlar ochiq emas, ammo bizning mudofaa sanoati kerakli natijalarga ega», - deya ta’kidladi Zelenskiy.

Uning so‘zlariga ko‘ra, hozir asosiysi, «armiya bu natijalarni amalga oshirishi» va harbiylar ularni jang maydonidagi muvaffaqiyatlarga aylantira olishi. Ukraina prezidenti Rossiyaning Ukraina shaharlariga havodan hujumlari va qo‘shinlari quruqlikda sekin oldinga siljishiga qarshi kurashni davom ettirishga chaqirib, Kiyev o‘z harbiy salohiyatini kuchaytirayotganini ta’kidladi.

Shveytsariyada Ukraina bo‘yicha tinchlik sammiti

Shu bilan birga, Volodimir Zelenskiy Shveytsariya prezidenti Viola Amherdga 15-16 iyun kunlari bo‘lib o‘tishi rejalashtirilgan Ukraina bo‘yicha tinchlik sammitini tashkil etgani uchun minnatdorchilik bildirdi va u yerda «urushni adolatli tugatish» loyihasini taqdim etishga va’da berdi. Bir kun oldin u Nyu-Yorkdagi Reuters NEXT konferensiyasida video-aloqa orqali boshqa davlatlarning tinchlik tashabbuslariga ochiq ekanini, biroq Rossiya bilan murosaga kelish imkoniyatini rad etganini aytdi.

Avvalroq Bern Shveytsariyada Ukrainadagi harbiy mojaroni hal qilish bo‘yicha oliy darajadagi tinchlik sammiti bo‘lib o‘tishi va u Rossiyaning tinchlik jarayonidagi ishtiroki bo‘yicha aniq yo‘l xaritasini yaratishga qaratilganini ma’lum qilgan edi. Moskva vakillari ushbu sammitda bo‘lmaydi, chunki Volodimir Zelenskiyning so‘zlariga ko‘ra, «ular hech narsaga to‘sqinlik qilmasligi kerak». O‘z navbatida, Rossiyaning Shveytsariyadagi elchixonasi Rossiya tomoni «hatto taklifnoma olgan taqdirda ham» buni qabul qilmasligini bildirdi. Shu bilan birga, Ukraina Xitoy rahbari Si Jinpingni ushbu uchrashuvga taklif qilgani ma’lum. 

Shu paytgacha Kiyev tinchlik muzokaralarini boshlashning dastlabki sharti sifatida Rossiya qo‘shinlarini Ukraina hududidan to‘liq olib chiqishni talab qilib kelgan. Shu bilan birga, Moskva Ukrainaning hech bo‘lmaganda egallab olingan hududlarini saqlab qolishga da’vo qilmoqda, deb eslatadi dpa agentligi. 

Shveytsariyadagi global tinchlik sammiti 2023 yilda Daniya, Saudiya Arabistoni va Maltada, shuningdek, 2024 yil 14 yanvarda Davosda bo‘lib o‘tgan Ukrainada tinchlik o‘rnatish bo‘yicha to‘rtta konferensiyaga o‘xshash formatda o‘tkaziladi.