3 mlrd so‘mlik tabiiy gazni o‘g‘irlagan fermer qamoqqa olindi 

Xorazm viloyati, Urganch tumanida 3 mlrd so‘mdan ortiq qiymatdagi tabiiy gazni o‘g‘irlagan fermer qamoqqa olindi. Bu haqda Bosh prokuratura xabar berdi. 

Qayd qilinishicha, «M.» fermer xo‘jaligi rahbari A.E. parrandachilik fermasini tabiiy gaz tarmog‘iga o‘zboshimchalik bilan ulab, 2 mln 249 ming kub.m. gazni o‘g‘irlagan. Oqibatda davlatga 3,3 mlrd so‘m zarar yetkazilgan. 

Holat yuzasidan Jinoyat kodeksining 169-moddasi («O‘g‘irlik») 4-qismi «a» bandi bilan jinoyat ishi qo‘zg‘atilib, gumonlanuvchi protsessual tartibda ushlangan. 

Ta’kidlanishicha, prokuratura organlari tomonidan yoqilg‘i-energiya resurslaridan noqonuniy foydalanish bilan bog‘liq holatlarni fosh etishga qaratilgan nazorat tadbirlari davom etmoqda.