Rossiyada Forbes jurnalisti armiya haqidagi «feyklar» uchun qo‘lga olindi

Forbes Russia yangiliklar bo‘limi jurnalisti Sergey Mingazov Xabarovskda Rossiya armiyasi haqida «feyklar» tarqatganlikda gumonlanib qo‘lga olindi. Bu haqda advokat Konstantin Bubon 26 aprel, juma kuni Facebook’da ma’lum qildi. 

Xabarda aytilishicha, gap Mingazovning «Xabarovskaya Mingazeta» Telegram-kanalida Buchadagi voqealar haqidagi ma’lumot repost qilishini haqida ketmoqda. Aniqlik kiritilishicha, jurnalist hozir vaqtinchalik saqlash hibsxonasida. 

Ayni paytda, «RBK» internet nashri Konstantin Bubonga tayanib, Mingazovda tintuv o‘tkazilgani, «uning, rafiqasi va bolalarining telefonlari va kompyuterlari olib qo‘yilgani» haqida yozdi. Sud jurnalistga nisbatan ehtiyot chorasini 27 aprel kuni belgilashi kutilmoqda. 

Sergey Mingazov ilgari «Vedomosti» gazetasi bilan hamkorlik qilgan, shuningdek, TASS axborot agentligining Xabarovskdagi muxbiri bo‘lgan. «Vajnyye istorii» internet-nashri jurnalistlari 440 ga yaqin obunachiga ega «Xabarovskaya Minggazeta» Telegram-kanalining mazmunini tahlil etib, 2022 yil aprel oyida Bucha voqealari haqidagi xabarlarning bir nechta repostlari e’lon qilinganini aniqladi. 

Rossiyada urushga qarshi ishlarda yuzlab ayblanuvchilar 

Rossiyada armiya haqidagi «feyklar» va uni qayta «obro‘sizlantirish» haqidagi jinoiy moddalar RFning Ukrainaga keng ko‘lamli hujumi boshlanganidan ko‘p o‘tmay paydo bo‘ldi. 

24 aprel kuni «OVD Info» inson huquqlari loyihasining ma’lum qilishicha, shu vaqtga qadar Rossiyada urushga qarshi ish bo‘yicha 902 nafar ayblanuvchi bo‘lgan, ulardan 261 nafari ozodlikdan mahrum qilingan va allaqachon tergov izolyatorlari, axloq tuzatish koloniyalari yoki majburiy davolanishda.

Loyihaga ko‘ra, ko‘pincha urush kontekstida fuqarolar «armiya haqidagi feyklar» (Rossiya Federatsiyasi Jinoyat kodeksining 207.3) moddasi bo‘yicha ta’qib qilinadi: 285 kishi sudlangan yoki sud qilinmoqda. «Armiyani obro‘sizlantirish» (Rossiya Federatsiyasi Jinoyat kodeksining 280.3) moddasi bo‘yicha 172 kishi sudlangan yoki sudlanyapti. Jinoiy ta’qiblar soni bo‘yicha uchinchi o‘rinda terrorizmga da’vat qilish (Rossiya Federatsiyasi Jinoyat kodeksining 205.2) moddasi bo‘lib, unga ko‘ra Ukrainadagi urush sharoitida 150 kishi jinoiy javobgarlikka tortilmoqda.