Janubiy Koreyaning O‘zbekistondagi yangi elchisi tayinlandi

Von Do Yon Janubiy Koreyaning O‘zbekistondagi yangi elchisi lavozimiga tayinlandi. 7 iyun kuni O‘zbekiston Tashqi ishlar vazirligida elchidan ishonch yorliqlari nusxalari qabul qilindi. 

«Koreya Respublikasi prezidenti Yun Sok Yol janobi oliylarining mamlakatimizga bo‘lajak tashrifini intiqlik bilan kutmoqdamiz. Prezidentlar sammitiga tayyorgarlik ko‘rish, qo‘shma loyihalarni amalga oshirish, davlatlarimiz o‘rtasidagi an’anaviy yaqin aloqalarda yangi o‘sish nuqtalarini kashf etish masalalariga alohida e’tibor qaratdik. Janob elchiga O‘zbekistondagi faoliyati davomida muvaffaqiyatlar tilaymiz», deyiladi vazirlik xabarida. 

Avvalroq, Janubiy Koreya prezidenti Yun Sok Yol O‘zbekiston, Turkmaniston va Qozog‘istonga davlat tashrifi bilan borishi haqida xabar berilgan edi.