«Hayot to‘xtab qolgan shahar». Ukrain harbiylari og‘ir sharoitlarda Chasiv Yarni himoya qilishda davom etmoqda

Ukrainadagi urushning 858-kuni o‘tdi. Asosiy ma’lumotlar:

Rossiya qo‘shini Xarkivga aviabomba tashladi. Bir kishi halok bo‘lib, yana to‘qqiz kishi jarohatlangan.
RF mudofaa vazirligi Donetsk oblastidagi Novooleksandrivka va Spirne qishloqlari egallanganini ma’lum qildi.
Rossiya qo‘shini Zaporijjya oblastining Volnyansk shahriga raketa zarbasi yo‘lladi. Yetti kishi halok bo‘lib, 38 kishi jarohatlangan. Shaharda motam e’lon qilingan.
Leningrad qamalini boshdan kechirgan, urushga qarshi chiqqan 88 yoshli Lyudmila Vasileva Peterburg gubernatorligi uchun o‘z nomzodini ko‘rsatishga kerakli miqdorda imzo yig‘a olmadi.
RF mudofaa vazirligi tunda Rossiyaning oltita regioniga 30 dan ortiq dronlar hujum qilgani haqida xabar berdi. Lipetskda sanoat zonasi zarba ostida qolgan.
Rossiya qo‘shini Kiyev bo‘ylab raketa zarbasi yo‘lladi. 14 qavatli turar joy binosi shikastlangan.

Chasiv Yar atrofidagi ukrain harbiylari

Rossiya qo‘shini qirol Daniil nomidagi 24-alohida mexanizatsiyalashgan brigada himoya qilayotgan Chasiv Yar tomon yurish qilishda davom etmoqda.

Brigadaning telegram-kanalida shahardagi vaziyat «o‘ta og‘ir» deb ta’riflangan, «dushman kuchlari sezilarli ustunlikka egaligi» va ukrainalik himoyachilarning «sharoiti haddan tashqari murakkabligi» aytilgan
Oleg Petrasiuk / Ukrainian 24 Mechanised brigade / AP / Scanpix / LETA

«Raqib shaharni barcha vositalar bilan shafqatsizlarcha yakson etmoqda, ulkan miqdordagi FPV-dronlar qo‘llamoqda, shahar himoyachilari ustiga [portlovchi moddalar] tashlanmoqda», — deya yozadi ukrainalik harbiylar o‘z telegram-kanalida
Oleg Petrasiuk / Ukraina QK matbuot xizmati / EPA / Scanpix / LETA

28 iyun kuni e’lon qilingan postda aytilishicha, Rossiya qo‘mondonligi «shaharni shturm qilishga desantchilar, maxsus topshiriqli bo‘linmalar hamda sobiq mahbuslardan tuzilgan „Shtorm V“ otryadlarini tashlab, ro‘paradan to‘xtovsiz hujum qilmoqda hamda uni qanotlardan aylanib o‘tishga harakat qilmoqda».
Oleg Petrasiuk / Ukraina QK matbuot xizmati / EPA / Scanpix / LETA

«Dushman bizdan taassurotlarning butun bir „guldastasi“ni olmoqda, ammo gap gullar haqida emas, balki „Gvozdika“ gaubitsasining 152 millimetr kalibrli snaryadlari haqida bormoqda», — deya yozadi 24-alohida mexanizatsiyalashgan brigada o‘z kanalida
Oleg Petrasiuk / Ukraineʼs 24th Mechanised Brigade / AP / Scanpix / LETA

24-alohida mexanizatsiyalashgan brigada jangchisi «Gvozdika» o‘ziyurar gaubitsasi oldida
Oleg Petrasiuk / Ukraineʼs 24th Mechanised Brigade / AP / Scanpix / LETA

«Ukrainaning Rossiya qo‘shini hujumiga uchragan har qanday shahri butkul vayron bo‘ladi», — deya yozadi ukrain harbiylari va «hayot to‘xtab qolgan shahar» bo‘lmish Chasiv Yar ham bu ro‘yxatni to‘ldirishi qo‘shimcha qilinadi
Oleg Petrasiuk / Ukrainian 24 Mechanised brigade / AP / Scanpix / LETA

«Biz bardosh berib turibmiz, ammo saflarimizda yo‘qotishlar ham bor. Halok bo‘lgan askarlar, serjantlar va ofitserlarga mangu shon-sharaf. Qasos olamiz», — deya va’da qilishgan ukrainalik jangchilar
Oleg Petrasiuk / Ukraina QK matbuot xizmati / EPA / Scanpix / LETA

Xarkiv bo‘ylab aviazarba oqibatlari

RF qo‘shini 30 iyun kuni Xarkivdagi «Novaya pochta» terminaliga FAB-500 aviabombasi tashladi.

Xarkiv oblasti rahbari Oleg Sinegubovga ko‘ra, aviazarba oqibatida «Novaya pochta»ning sakkizta yuk avtomobili yakson etilgan
Vitalii Hnidyi / Reuters / Scanpix / LETA

10 kishi, jumladan sakkiz oylik chaqaloq jarohatlangan
Vitalii Hnidyi / Reuters / Scanpix / LETA

Sinegubov o‘z telegram-kanalida yozishicha, bir kishi halok bo‘lgan
Andrii Marienko / AP / Scanpix / LETA

Xarkiv oblasti rahbari ishlab chiqarish binolari va omborxonalar, shuningdek tibbiyot muassasasi shikastlangani haqida xabar bergan
Vitalii Hnidyi / Reuters / Scanpix / LETA

Kiyev o‘qqa tutilishi oqibatlari

30 iyun kuni kechqurun Rossiya qo‘shini Kiyev bo‘ylab raketa zarbasi yo‘lladi. Ukraina poytaxtining Obolon rayonida 14 qavatli turar joy binosi shikastlangan.