Ukraina dronlari Rossiyaning kamida 14 regioniga hujum qildi

Ukraina dronlari yana Rossiya regionlari bo‘ylab yopirilma hujum amalga oshirdi. RF mudofaa vazirligi hisobotiga ko‘ra, Rossiyaning 14 regioni, anneksiya qilingan Qrim va Azov dengizi uzra ukrainlarning 249 ta droni urib tushirilgan.

Yaroslavl oblasti rahbari Mixail Yevrayev dronlar yoqilg‘i saqlanuvchi sanoat obektlariga urilgani va buning natijasida yong‘in chiqqani haqida xabar bergan. U aynan qaysi obektlar hujumga uchraganiga aniqlik kiritmagan. Jabrlanganlar haqida ma’lumot yo‘q. Hujum vaqtida mahalliy rasmiylar hudud markazidan poytaxt Moskva tomon transportlar harakatini to‘sib qo‘ygan.

Rossiyaning Astra nashri jurnalistlari ijtimoiy tarmoqlarda tarqalgan foto va videolarni tahlil qilib, regiondagi hujum nishoni Ribinskda joylashgan «Temp» kombinati bo‘lgan, degan xulosaga kelishgan. Ushbu korxonada yoqilg‘i ham saqlanadi. Ukraina bu kombinatga 2025 yil 31 dekabrida ham hujum qilgandi.

Ribinsk uzra quyuq tutun ko‘tarilgan, mahalliy aholi vakillari dronlar hujumidan keyin shahar uzra «neft yomg‘iri» yog‘ib o‘tganini aytishgan.

Tula oblastida urib tushirilgan dron qoldiqlari Novomoskovskdagi sanoat korxonalaridan birining hududiga qulagan, deb xabar berdi gubernator Dmitriy Milyayev. U gap aynan qaysi korxona haqida ketayotganiga aniqlik kiritmagan. Jabrlanganlar haqida ma’lumot yo‘q.

Astra nashri va Ukrainadagi Exilenova+ telegram-kanaliga ko‘ra, ukrain dronlari hujumidan keyin «Azot» kimyo kombinatida yong‘in chiqqan. Ukraina bu kombinatga ham avval bir necha bor zarba bergandi, oxirgisi 8 iyun kuni kuzatilgan. Zavod saytida «Azot» – mamlakatdagi eng yirik ammiak va azotli o‘g‘it ishlab chiqaruvchisi ekani qayd etilgan (azot kislotasi portlovchi moddalar ishlab chiqarishda qo‘llanadi). 

Orlov oblasti gubernatori Andrey Klichkov «tun notinch o‘tgani»ni xabar qilgan. Rasmiylarga ko‘ra, Oryol shahrida ukrainlar droni ko‘p qavatli turar joy binosiga urilgan. Jurnalistlar aniqlashicha, gap «Zeleniy ostrov» turar joylar kompleksi haqida bormoqda. Uyning bir necha qavati olov ichida qolgan. Hodisa oqibatida bir kishi halok bo‘lib, yana sakkiz kishi yaralangan. Hujumga uchragan kvartiralarda yashovchilar mehmonxonalarga joylashtirilgan.

Smolensk oblastining Vyazme shahrida ukrain droni parchalari xususiy uylardan birining ustiga qulagan, deb xabar beradi gubernator Vasiliy Anoxin. U yerda yong‘in chiqqan. Jabrlangan ayol shifoxonaga yotqizilgan. Anneksiya qilingan Qrimning RF tomonidan tainlangan rahbari Sergey Aksenov Saki shahrida dronlar hujumi oqibatida bir ayol halok bo‘lgani to‘g‘risida xabar qilgan.

Bundan tashqari, 13 iyun kuni kechqurun anneksiya qilingan Zaporijjya oblastining RF tomonidan tayinlangan gubernatori Yevgeniy Balitskiy ukrainlar hujumi oqibatida regionda energetika obektlari shikastlanganini ma’lum qilgan. Hududning bir qismi elektr ta’minotisiz qolgan.

Xerson oblastining RF tomonidan anneksiya qilingan qismi ham to‘liq elektr ta’minotidan uzilgan. «Xersonenergo» kompaniyasi buni «Zaporijjya oblasti energetika tizimidagi texnik buzilish» bilan izohlagan.

Ukraina prezidenti Volodimir Zelenskiy Tula va Yaroslavl oblaslaridagi korxonalarga zarba berilganini tasdiqladi. Shu bilan birga, u Ukraina chegaradan 700 kilometrdan ortiq masofadagi obektlarga hujum qilganini ta’kidladi.

«Ukraina Rossiyaga qarshi uzoq masofali sanksiyalar rejasini va Rossiyaning bu urushni tugatishdan bosh tortishiga javoban o‘rta masofali zarbalar berish bo‘yicha belgilangan vazifalarni bajarmoqda. Biz Rossiya rahbariyatiga muzokaralarning barcha mumkin bo‘lgan formatlarini taklif qildik, ammo javob faqat tajovuzni davom ettirish va uni kengaytirishga urinish bo‘ldi. Urush kelgan joyiga qaytishi mantiqan to‘g‘ri. Ukrainaga tinchlik kerak», –deya qo‘shimcha qildi Zelenskiy.

Ukraina rahbari Rossiya harbiylari ham Ukraina shaharlari va boshqa aholi punktlariga yuzlab zarbalar berayotganini eslatdi. Uning so‘zlariga ko‘ra, o‘tgan haftaning o‘zida «rossiyaliklar Ukrainaga 1920 ta zarbdor dron, 1790 ta aviabomba va 17 ta turli xil raketalarni uchirgan». U «Katta yettilik»ning 15–17 iyun kunlari Fransiyada bo‘lib o‘tadigan sammitida hujumlardan himoyani kuchaytirishni muhokama qilishga va’da berdi.

Ukraina qurolli kuchlari havo kuchlariga ko‘ra, RF qo‘shini 14 iyunga o‘tar kechasi Ukraina bo‘ylab 98 ta dron uchirgan. Ukrainalik harbiylar 91 ta dronni urib tushirgan. Ukraina regionlari rasmiylari Mikolayiv, Dnipropetrovsk, Zaporijjya oblastlari bo‘ylab zarbalar haqida xabar bergan. Xususan, Mikolayivda transport va energetika infratuzilmalari zarbaga uchragan.