Bayden Netanyahuga yordamni to‘xtatish bilan tahdid qilmoqda - OAV

AQSh prezidenti Jo Bayden Isroil bosh vaziri Binyamin Netanyahuni mintaqaviy urush xavfi ortib borayotgani sababli zo‘ravonlikning keskinlashishidan ogohlantirdi. Bu haqda Axios o‘z manbalariga tayanib xabar berdi.

Qayd etilishicha, Oq uy rahbari shaxsiy suhbat chog‘ida Netanyahudan mintaqadagi keskinlikning kuchayishini to‘xtatishni, zudlik bilan G‘azodagi garovga olinganlar bo‘yicha kelishuvni qabul qilishni va o‘t ochishni to‘xtatishni talab etgan.

«Bayden va yordamchilari Netanyahuning to‘rt yil ichida Oq uyga birinchi tashrifidan bir hafta o‘tib sodir bo‘lgan Isroilning Bayrut va Tehrondagi qotilliklarining oqibatlaridan hafsalasi pir bo‘ldi», deyiladi maqolada.

Nashrga ko‘ra, AQSh rasmiylari 1983 yilda Bayrutda 241 nafar AQSh askarining o‘ldirilishida ishtirok etgan «Hizbulloh» oliy harbiy qo‘mondoni Fuad Shukrning o‘limi yoki HAMAS siyosiy yetakchisi Ismoil Haniyaning o‘ldirilishidan afsusda emas.

«Ammo ular Netanyahuni ushbu operatsiyalar haqida Baydenni ogoh etmaganlikda ayblashadi. Bayden ma’muriyati Isroil va HAMAS o‘rtasidagi kelishuvni Yaqin Sharqdagi urushdan keyingi strategiya markazida qo‘yadi. Bayden kelishuvga erishishni lavozimida qolgan olti oy davomida o‘z merosining asosiy elementi deb hisoblaydi», deyiladi maqolada.

AQSh rasmiylarining jurnalistlarga aytishicha, Bayden Netanyahuga qo‘ng‘iroq qilib, Eron va «Hizbulloh»ning ehtimoliy qasos olishiga AQSh va Isroilning birgalikdagi harbiy tayyorgarliklarini muhokama qilgan, biroq u Isroil bosh vazirining o‘tgan hafta tutgan yo‘lidan norozi ekanini ham aniq bildirgan.

«Bayden Netanyahudan norozi bo‘lgan. Chunki ular o‘tgan hafta Oq uyda kelishuvni ta’minlash haqida gaplashib olgan bo‘lsa-da, Netanyahu buning o‘rniga Tehronda qotillik sodir qilgan... Shuningdek, Bayden Netanyahuni vaziyat yana keskinlashsa, o‘zidan yordam kutmasligi haqida ogohlantirgan», deyiladi maqolada.

Shu bilan birga, nashrning ta’kidlashicha, Isroil bosh vazirining idorasi Netanyahu «Amerika qo‘llab-quvvatlashini qadrlashi va Isroil bosh vaziri sifatida u faqat Isroil davlatining xavfsizlik manfaatlariga muvofiq harakat qilishini» aytgan.