Eron Vengriya orqali Isroilga bo‘lajak hujum haqida ogohlantirish yubordi

Eron Isroilga qarshi hujumga tayyorlanmoqda va Tel-Avivga ogohlantirish yuborgan. Bu haqda Isroil tashqi ishlar vaziri Israel Kats ma’lum qildi, deb yozdi The Jerusalem Post.

Kats so‘zlariga ko‘ra, Vengriya tashqi ishlar vaziri Peter Siyarto unga qo‘ng‘iroq qilib, Eron tashqi ishlar vaziri Ali Boqiriydan tegishli ma’lumot olganini aytgan.

«Eron bizga Isroilga hujum qilish niyatida ekanligini aytdi. Dunyo Erondan har qanday tajovuzkor harakatlari uchun javobgarlik talab qilishi kerak», dedi Kats.

Kats boshqa tafsilotlarga to‘xtalmadi.

Eron 31 iyulga o‘tar kechasi Tehronda HAMAS siyosiy byurosi rahbari Ismoil Haniyaning o‘ldirilishiga javoban Isroilga zarba berishini e’lon qilgan edi. Isroil ushbu qotillikda rasman javobgarlikni o‘z zimmasiga olmagan.

O‘z navbatida Isroil bosh vaziri Binyamin Netanyahu hukumati ham Eronga ogohlantiruvchi zarba berishni ko‘rib chiqayotgani xabar qilingan edi.