AQSh Belarusga qarshi sanksiyalarni kengaytirdi

AQSh Moliya vazirligining Xorijiy aktivlarni nazorat qilish boshqarmasi (OFAC) Belarusga yangi sanksiyalar kiritdi - 19 shaxs va 14 tashkilotga qarshi - shuningdek, samolyotga cheklovlar qo‘ydi. Bu haqda 9 avgust, juma kuni AQSh vazirligi ma’lum qildi.

Ushbu choralar harbiy materiallar ishlab chiqarish, sanksiyalardan qochish va Belarus rahbari Aleksandr Lukashenko atrofidagi oligarxlar orasida daromad olish orqali Rossiyaning Ukrainaga qarshi urushini qo‘llab-quvvatlashni to‘xtatishga qaratilgan.

Cheklovlar 2020 yil avgustida Belarusda bo‘lib o‘tgan prezidentlik saylovlarining to‘rt yilligi fonida tasdiqlangan.

Hukumat bortiga ham cheklovlar kiritildi

Ro‘yxatga "Belkanto", "RubiStar" va "Rada" aviakompaniyalari kirdi. Bundan tashqari, ro‘yxatda Belarus hukumatiga tegishli bo‘lgan va Lukashenko aviafloti tarkibida foydalaniladigan Boeing 767-32K(ER) ham bor.

«Lukashenkoning Rossiyaning Ukrainaga qarshi asossiz urushini qo‘llab-quvvatlashi Belarusga qimmatga tushmoqda», deya ma’lum qildi Vashington. «Lukashenko o‘z mamlakatining muxtoriyati va xalqaro hamjamiyatdagi mavqeyini o‘zi va sheriklari uchun moliyaviy va siyosiy manfaatlar evaziga sotib yubordi», - deya qo‘shimcha qilindi u yerda. AQSh choralari Qo‘shma Shtatlarning Lukashenko rejimini «Belarus demokratik harakatiga qilingan hujumlari va Belarus xalqini qo‘pol ravishda ekspluatatsiyasi» uchun javobgarlikka tortish majburiyatini kuchaytiradi, deya qayd etdi OFAC.

YeI, AQSh, Kanada va Britaniya Belarus xalqi bilan birdamlikda

Ayni paytda Yevropa tashqi harakatlar xizmati Yevropa Ittifoqi, AQSh, Kanada va Britaniyaning qo‘shma bayonotini e’lon qildi. Ular «biz Lukashenko rejimi tomonidan davom etayotgan repressiyalarga qaramay, demokratik o‘zgarishlar, inson huquqlarini hurmat qilish va barcha siyosiy mahbuslarni ozod qilishga intilayotgan Belarus xalqi bilan birgamiz», deb ta’kidladi.

G‘arb Belarus hukumatini Belarus qamoqxonalarida saqlanayotgan 1400 ga yaqin siyosiy mahbusni «zudlik bilan va so‘zsiz» ozod qilishga chaqirdi. Ular, shuningdek, Rossiyaning Ukrainaga qarshi urushida ishlatilgan komponentlarni Belarus orqali yetkazib berishni to‘xtatish bo‘yicha keyingi qadamlarni va’da qildi.

YeI sanksiyalar rejimi 260 dan ortiq kishiga nisbatan qo‘llandi

Yevropa Ittifoqi kengashi Belarusda 28 kishiga nisbatan sanksiyalar joriy qildi. Bu haqda 5 avgust kuni Kengash matbuot xizmati xabar berdi.

Belarus rahbari Aleksandr Lukashenkoning «uzoq yillik tarafdorlari guruhi» cheklov choralari ostida qoldi. Ular orasida BelTA davlat agentligi bosh direktori Irina Akulovich, Milliy assambleyadagi Yoshlar kengashi raisi Nikita Rachilovskiy va Lukashenko matbuot xizmatining sobiq rahbari Dmitriy Juk bor.

Hammasi bo‘lib, Yevropa Ittifoqining individual cheklov choralari 261 kishiga, shuningdek, Belarusdagi 37 tashkilot va muassasaga nisbatan qo‘llandi.