Isroil Eronga har qanday hujumga javob qaytarilishi bilan tahdid qildi

Eron hujumi natijasida Isroil tomonida qurbonlar bo‘lmasa ham javob zarbasi beriladi, deb xabar qildi Isroil armiyasi radiosi.

Foto: Majid Asgaripour/WANA/Reuters

Isroil Eronning har qanday to‘g‘ridan to‘g‘ri hujumiga javoban Islom Respublikasi hududiga zarba beradi.

Isroil armiyasi radiosiga ko‘ra, Tel-Aviv bu haqda AQSh va qator Yevropa davlatlarini xabardor qilgan.

Radiostansiyaning qayd etishicha, javob zarbasi Eron hujumi natijasida Isroil tomonida qurbonlar bo‘lmagan taqdirda ham amalga oshiriladi.

Isroil Eron tomonidan joriy yilning aprel oyida yuzlab uchuvchisiz uchoqlar va raketalar uchirilganidan ko‘ra kattaroq hujumga tayyorgarlik ko‘rmoqda, deb xabar berdi kecha Isroilning KAN jamoat telekanali.

31 iyul kuni Falastinning Hamas harakati siyosiy byurosi raisi Ismoil Haniya Tehronda suiqasd natijasida halok bo‘ldi.

Eron va Hamas Isroilni qotillikni uyushtirganlikda aybladi.

Eron Hamas yetakchisining o‘ldirilishiga javob qaytarishga va’da berdi.

#Eron #Isroil

2023 yil 7 oktyabr kuni G‘azo bo‘lgasidagi Hamas kuchlari Isroilga yoppasiga raketa zarbalari berib, chegaradagi aholi punktlarini egallay boshladi. Bunga javoban Isroil qo‘shinlari G‘azo bo‘lgasiga bostirib kirdi. Bu safargi eskalatsiya avval kuzatilmagan darajada ko‘p qurbonlarga olib keldi.