JCh-2026 saralashi. O‘zbekiston safarda Qirg‘izistonni mag‘lub etib, guruh peshqadamiga aylandi

Uchrashuvning 15-daqiqasida «Dinamo» hujumchisi Joel Kojo hisobni ochib, qirg‘izlarni hisobda oldinga olib chiqqan bo‘lsa, keyingi hujumdayoq Eldor Shomurodov muvozanatni tikladi – 1:1.

35-daqiqada Odiljon Abdurahmonov stadionni ikkinchi bor larzaga keltirib, mezbonlarni hisobda oldinga olib chiqdi – 2:1.

Bo‘lim yakunida esa Sherzod Nasrullayevning uzatmasini Husniddin Aliqulov bosh bilan golga aylantirdi – 2:2.

Ikkinchi bo‘limda esa raqibdan ustunligini ko‘rsata olgan Srechko Katanets shogirdlari 72-daqiqada nihoyat hisobda oldinga chiqib olishdi. Shomurodovning zargarona pasini Oston O‘runov chiroyli harakatlari va zarbasi bilan g‘alaba goliga aylantirdi – 3:2.

Shu tariqa, O‘zbekiston milliy jamoasi dastlabki ikki turni ham g‘alaba bilan yakunlab, 6 ochko bilan hozircha turnir A guruhi peshqadamiga aylandi.

Guruhdagi dastlabki bahsda KXDR Qatar bilan durang (2:2) qayd etgan bo‘lsa, yana bir uchrashuvda BAA bugun Eronni qabul qiladi.

JCh-2026 saralashi. A guruhi. 2-tur
10 sentabr (seshanba)
Qirg‘iziston – O‘zbekiston – 2:3
Hakam: Ahmad Al-Ali (Kuvayt)

Gollar: Joel Kojo 15, Odiljon Abdurahmonov 35 – Eldor Shomurodov 17, Husniddin Aliqulov 45, Oston O‘runov 72.

Qirg‘iziston: 1. Erjan Tokotayev, 2. Valeriy Kichin, 3. Tamirlan Kozubayev, 6. Kristian Brauzman, 7. Joel Kojo (9. Ernist Batirkanov, 78), 12. Odiljon Abdurahmonov, 14. Aleksandr Mishenko, 17. Eldiar Zaripbekov, 18. Kairat Jgalbek Uulu (10. Guljigit Alikulov, 60), 19. Ermek Kenjyebayev (15. Suiuntbek Mamaraliyev, 78) 22. Alimardon Shukurov.

O‘zbekiston: 1.O‘tkir Yusupov, 3.Hojiakbar Alijonov (19. Aziz Turg‘unboyev, 62), 5.Rustam Ashurmatov (Abdulla Abdullayev, 62), 7.Otabek Shukurov, 9.Odil Hamrobekov, 10.Jaloliddin Masharipov (22. Abbosbek Fayzullayev, 75) 11.Oston O‘runov (Hojimat Erkinov, 89), 13.Sherzod Nasrullayev, 14.Eldor Shomurodov, 15.Umar Eshmurodov, 23.Husniddin Aliqulov.