JCh kundaligi. Ronaldu yana yig‘ladi, AQSh 4 ta gol o‘tkazdi

Tanaffusdan keyin ham o‘yin qarama-qarshi kurslarda kechdi. Mendesh Yamalni zararsizlantirishda davom etdi, ammo 50-daqiqada amalda o‘yin natijasiga ta’sir ko‘rsatgan epizod sodir bo‘ldi. Lamin navbatdagi marta portugallar jarima maydoniga yorib kirdi, uni qarshi olgan Mendesh xavfni bartaraf etdi, ammo shu vaziyatda jarohat olib, o‘yinni davom ettira olmaydigan bo‘ldi.

Shundan keyin portugallar Yamalni ikki kishi bo‘lib qo‘riqlay boshladi, bu esa boshqalarning imkoniyatini yaxshiladi.

O‘yinning so‘nggi qismida futbolchilar charchab qolishdi va  murabbiylar shaxmat o‘ynashga kirishdi. De la Fuente Pedrini, Martines esa Vitinyani maydondan olishiga to‘g‘ri keldi.

O‘yin overtaymga qarab keta boshladi. Ammo o‘yinga qo‘shib berilgan daqiqalar boshlanganida portugallar konsentratsiyani yo‘qotishdi. Portugallar safida zaxiradan o‘yinga qo‘shilgan Bernardu Silva keraksiz vaziyatda Mikel Merinoga fol ishlatdi, ispanlar to‘pni tezda o‘yinga kiritib yuborishdi va kombinatsiya yakunida «Arsenal» yarimhimoyachisi darvozabon bilan yakkama-yakka vaziyatga chiqib borib, g‘alaba golini urdi.

Portugallar qolgan daqiqalarni to‘liq hujumda o‘tkazishdi, ammo mag‘lubiyatdan qutulib qola olishmadi. Yevropa chempionlari jahon chempioni bo‘lish yo‘lidagi yurishini davom ettirdi.

O‘yin yakunlanganidan keyin barcha kameralar yig‘layotgan Ronalduga qaratildi. U faoliyatida oltinchi marta jahon chempionatini erta tark etdi, bu safargisi esa yanada og‘riqli edi – o‘yindan oldin u bu turnir faoliyatidagi oxirgisi bo‘lib qolishini tasdiqlagandi.

Ronaldu oltita jahon chempionatida (hech kimda bu qadar ko‘p ishtirok yo‘q) 27 o‘yin o‘tkazdi va 11 gol urdi. Ammo baribir titulni qo‘lga kirita olmadi.

Belgiya AQShni jazoladi

AQSh – Belgiya 1:4
Gollar: De Ketelare, 9 (0:1). Tillman, 31 (1:1). De Ketelare, 33 (1:2). Vanaken, 57 (1:3). Lukaku, 90+3 (1:4)
AQSh: Friz, Richards, Rim, Robinson (Arfsten, 90+2), Frimen, Adams (Pepi, 72), Tillman, Makkenni, Pulishich (Berhalter, 59), Dest (Reyna, 46), Balogun (Rayt, 90+2)
Belgiya: Kurtua, Mehele, Ngoy, De Kyuyper, Kastan, Raskin (Vitsel, 89), Onana (Vanaken, 21), Tilemans, Trossar (Salemakers, 89), Lukebakio (Lukaku, 67), De Ketelare (Doku, 67)
Ogohlantirishlar: Makkenni, 35. Tillman, 69

AQSh va Belgiya milliy jamoalari o‘zaro o‘yinda chorakfinalda Ispaniyaga kim raqib bo‘lishiga oydinlik kiritishdi. Yakunda turnir mezbonlari yirik hisobda mag‘lub bo‘lishdi.

Aytish mumkinki, o‘yin oldidan bo‘lib o‘tgan voqealar Belgiya futbolchilarini yanada jipslashtirdi (FIFA Trampning so‘rovi bilan Folarin Balogunning diskvalifikatsiyasini kechiktirgan, Belgiya tomonining e’tirozi esa qanoatlantirilmagandi).

O‘yin boshlanishi arafasida jamoa sardori Romelu Lukaku butun jamoani bitta joyga yig‘di va ehtirosli nutq so‘zladi. Va «qizil iblislar» ilk daqiqalardan raqibni yanchib tashlash uchun oldinga tashlanishdi – yevropaliklar bu turnir boshidan buyon bu qadar jahldor ko‘rinishmagandi. Amerikaliklar darvozaboni Metyu Friz birinchi daqiqadayoq qahramonlik ko‘rsatib, Timoti Kastanning yuqori burchakka yo‘llagan zarbasini qaytarishiga to‘g‘ri keldi. Ammo u uzoq dosh berolmadi va Sharl De Ketelare 9-daqiqada baribir hisob ochdi. 

Mezbonlar esa maydonda umuman yo‘qolib qolishdi. Muxlislar Jyessi Marsh shogirdlarini bu turnirda hali bu qadar ilojsiz va parokanda holda ko‘rishmagandi. Va faqat suv ichish uchun qilingan tanaffusdagina Maurisio Pochettino shogirdlarini o‘ziga keltira oldi va ko‘p o‘tmay hisob tenglashdi. Bu vaziyatda Malik Tillmanning zarbasidan keyin to‘p raqib futbolchisiga tekkan holda yo‘nalishni o‘zgartirishi amerikaliklarga qo‘l keldi.

Ammo Belgiya o‘tkazib yuborilgan golni his qilmadi. Jamoa to‘p maydon markaziga keltirilishi bilan yana oldinga yugurdi va hisobda yana oldinga chiqib oldi – De Ketelare bu safar Leandro Trossarning qanotdan uzatmasini golga aylantirdi. Birinchi bo‘lim statistikasi maydondagi vaziyatni yaqqol ifodalardi: zarbalar soni – 11:3, darvoza sohasiga to‘g‘ri borgan zarbalar soni – 5:1, xG – 1,90 ga 0,42. Barchasi Belgiya foydasiga.

Birinchi bo‘lim oxiri va ikkinchi bo‘lim boshini AQSh nisbatan yaxshi o‘tkazdi, ammo 57-daqiqadagi halokatli xato o‘yin taqdirini hal qildi. Darvozabon Friz himoyachilarga yordam berish uchun jarima maydonini tashlab chiqdi, ammo to‘pdan o‘z vaqtida qutulish o‘rniga sustkashlik qildi va uni Vanakenga sovg‘a qildi – belgiyaliklar yarimhimoyachisi esa osonlik bilan bo‘sh darvozani ishg‘ol etdi. Amerikaliklar sardori Tim Rim zarbani to‘sishi mumkin edi, ammo to‘p yo‘liga oyog‘ini to‘g‘ri qo‘ya olmadi.

Biroz o‘tib mezbonlar yetakchisi Kristian Pulishich jarohat olib maydonni tark etdi. Qolgan daqiqalarda amerikaliklar javob golini urishga qattiq harakat qilishdi, ammo o‘yin yirik hisobda yakunlandi. Romelu Lukaku bu safar ham zaxiradan o‘yinga qo‘shilib, o‘z nomini tabloga yozdirib qo‘ydi va jahon chempionatida to‘rtta o‘yinda joker sifatida gol urgan ilk futbolchiga aylandi.

Endi «qizil iblislar» 10 iyul kuni chorakfinal doirasida Ispaniyaga qarshi maydonga tushadi.

Tramp tan oldi

AQSh prezidenti Donald Tramp FIFAdan mamlakat milliy jamoasi hujumchisi Folarin Balogunning qizil kartochkasini bekor qilishni so‘raganini rasman tan oldi. Avvalroq Xalqaro futbol federatsiyasi shov-shuvli tarzda ushbu amerikalik futbolchining diskvalifikatsiyasini bir yilga kechiktirgandi va unga Belgiyaga qarshi o‘yinda qatnashish imkonini bergandi.

Tramp matbuot anjumanidagi so‘zlari bilan haqiqiy futbolni amerikacha sokkerdan u qadar farqlay olmasligini ko‘rsatib qo‘ydi.

«Men epizodni ko‘rdim. Sportni juda yaxshi tushunaman. U yerda fol yo‘q edi. Shunchaki ikki kuchli yigit katta tezlikda yugurib, bir-biri bilan to‘qnashib ketdi. Bu hakam esa o‘ta shubhali edi», – degan Tramp.

U futbolchi qizil kartochka uchun keyingi o‘yinga diskvalifikatsiya qilinishini tushuna olmasligini, futbolchi hali o‘ynamagan o‘yini uchun jazolanmasligi kerakligini aytgan.

Shuningdek, Balogunni amalda Messi, Ronaldu, Keyn kabi yulduzlar bilan bir o‘ringa qo‘ygan.

«Messi kim bilandir to‘qnashgani uchun chetlatilsa, bunga qanday qaragan bo‘lardingiz? Yoki Ronaldu kimgadir urilib ketgani uchun o‘yindan olib tashlansa? Yoki Keyn kimnidir urib yuborgani uchun jazolansa? Bunday qilish kerak emas», deydi AQSh prezidenti.

Shundan keyin u o‘z iltimosini yerda qoldirmagani uchun FIFA prezidentiga yana bir bor minnatdorchilik bildirib, endi uni avvalgidan ko‘ra ko‘proq hurmat qilayotganini aytgan.

Mbappe irqchilikka uchradi

Jahon chempionati nimchorakfinalida Fransiya va Paragvay o‘rtasida kechgan uchrashuv atrofida mojaro davom etmoqda. Bu o‘yin futbol tarixidagi eng yoqimsiz lahzalardan biri sifatida qoladi – o‘zbekistonlik hakam Ilgiz Tantashev boshqargan ushbu o‘yinda jamoalar futbol o‘ynashdan ko‘ra, bir-biriga ozor yetkazish bilan ko‘proq shug‘ullanishgandi.

Ammo bu hali hammasi emaskan. Paragvaylik senator Selesta Amarilya Fransiya milliy jamoasi hujumchisi Kilian Mbappega irqchilik qilib, o‘ta keskin ohangda fikr bildirdi.

«O‘zini fransuz qilib ko‘rsatayotgan kamerunlik. Kalondimog‘, puldor va xunuk. U butun o‘yin davomida asabiylashdi va butun jamoasi kabi o‘lguday qo‘rqib ketdi, ular birorta ham gol ura olishmadi va baxtli tasodif tufayligina g‘alaba qozonishdi... Yigitcha hatto yozishni ham o‘rganmagan, ona suti o‘rniga kokos sutini ichgan, uning yonidagilarning eng o‘qimishlisi esa shimpanzelar edi», – deya yozgan Amarilya ijtimoiy tarmoqlarda.

Uning bu qadar oshkora nafratini Fransiyadagilar e’tiborsiz qoldira olmasdi. Mahalliy futbol federatsiyasi prokuraturaga murojaat qilishini ma’lum qildi, Mbappening o‘zi esa Amarilyani «manfur xotin» deb atadi va uni «jahon chempionatida ehtirosli va sharafli o‘ynagan Paragvay milliy jamoasi qahramonligini qadrsizlantirish»da aybladi.

Navbatdagi o‘yinlar

Jahon chempionatida 1/8 final bosqichi yakunlanmoqda – 7 iyul kuni kechqurun va 8 iyulga o‘tar kechasi quyidagi o‘yinlar bo‘lib o‘tadi:

21.00. Argentina – Misr
01.00. Shveytsariya – Kolumbiya