Rossiyalik bloger O‘zbekiston poyezdidagi sayohatni «haqiqiy sinov» deb ta’rifladi

Fevral oyi oxirida O‘zbekistonga kelgan sayohatchiga vagonlardagi isitish tizimi ko‘proq muammo keltirgan - ular juda issiq bo‘lgan.

Foto: Layk Trevel Puteshestviya

Rossiyalik trevel-bloger (sayohatlar haqida blog yurituvchi) ayol O‘zbekiston poyezdining platskart vagonida safar qilib, hech kimga, hech qachon bunday qilmaslikni tavsiya etdi. U Dzen platformasidagi «Layk Trevel Puteshestviya» blogida o‘z taassurotlari bilan o‘rtoqlashdi.

Ayolning so‘zlariga ko‘ra, u fevral oyi oxirida O‘zbekistonning uchta shahri — Toshkent, Buxoro va Xivada bo‘lgan. Shaharlar orasida poyezdda sayohat qilgan va ko‘pincha platskart vagonining yuqori o‘rindig‘idan joy topgan. Biroq, ayolga vagonlardagi isitish tizimi ko‘proq muammo keltirgan — ular juda issiq bo‘lgan.

Blogerning so‘zlariga ko‘ra, poyezddagi barcha mahalliy ayollar kamtarona kiyingan va juda issiq bo‘lganiga qaramay, ustki kiyimlarini yechmagan. Shuning uchun ayol ulardan o‘rnak olishga va chidashga qaror qilgan. Biroq, ertalab u qolgan sayohatchilarning ortiqcha kiyimlaridan qutulganini payqaydi.

«O‘zbek poyezdidagi tunim chinakam sinovga aylandi, meni faqat mehribon, ijobiy va juda mehmondo‘st o‘zbeklar qutqardi, ular bilan muloqot qilish uchun men shunday issiq kechaga chidadim», deb xulosa qildi ayol.