Niderlandiyada muzey xodimi metall bankalar ko‘rinishidagi art-obektni tashlab yubordi

Niderlandiyadagi LAM muzeyi xodimi fransiyalik ijodkor Alexandre Lavetning «Birgalikda o‘tkazgan barcha yaxshi damlarimiz» nomli asarini chiqindi deb o‘ylab, tashlab yubordi.

AFP agentligining ma’lum qilishicha, art-obekt pivo uchun mo‘ljallangan ikkita alyuminiy idishdan iborat bo‘lib, rassom akril bo‘yoqlar bilan unga qo‘lda tasvirlar tushirgan. Muzey vakillarining so‘zlariga ko‘ra, Lavet buni yaratish uchun «ko‘p vaqt sarflagan va mehnat qilgan».

LAM’dagilar art-obekt tomoshabinlarni hayratga solishi uchun uni lift kabinasiga joylashtirishga qaror qilgan.

Lavetning ishi muzeyda ko‘rgazmaga qo‘yilgan kunlarning birida nazoratchi Eliza van den Berg tanaffusdan qaytib, bankalar yo‘qolganini sezib qolgan. Oxir-oqibat uni chiqindi qopidan topgan. Aniqlanishicha, muzey chilangari liftda bankalarga duch kelib, uni tashlab yuborgan.

Eliza van den Berg LAM’da yaqindagina ish boshlagan chilangardan xafa emasligini ma’lum qildi. «U shunchaki o‘z vazifasini bajardi. Endi biz art-obekt sarguzashtdan keyin dam olishi uchun uni an’anaviy postamentga o‘rnatdik», — deydi ayol.