Sahroyi Kabirda kuchli yog‘ingarchilik - fotosuratlar

Associated Press agentligi Marokash janubi-sharqidagi Sahroi Kabir cho‘lida kuzatilgan kuchli yomg‘irdan keyingi suratlarni e’lon qildi.

Qayd etilishicha, dunyoning eng qurg‘oqchil joylaridan birida ko‘p miqdorda yomg‘ir yog‘gan. Marokash hukumatining hisob-kitoblariga ko‘ra, sentabr oyida bir nechta tuman, jumladan, Tata shahriga ikki kunda o‘rtacha bir yilda kuzatiladigan yomg‘ir yog‘gan (o‘rtacha yillik ko‘rsatkich — 250 millimetrdan kam).

Marokash poytaxti Rabotdan 450 kilometr janubda joylashgan Tagunite qishlog‘ida bir sutkada 100 millimetrdan ortiq yog‘in kuzatilgan. Mamlakat Meteorologiya bosh boshqarmasi xodimi Xussin Yuabebning ma’lum qilishicha, 30-50 yildan beri qisqa muddat ichida bunchalik ko‘p yomg‘ir yog‘magan.

Agentlik suhbatdoshining aytishicha, ushbu siklon tufayli yaqin oy va yillarda mintaqada ob-havo o‘zgarishi mumkin — havodagi namlik hisobiga bug‘lanish ortadi, bu esa yangi yog‘ingarchilikni keltirib chiqaradi. Ta’kidlanishicha, Marokash va Jazoirda sentabr oyi boshida 20 dan ortiq kishi yog‘ingarchilik qurboniga aylangan.