Hindiston aviakompaniyalariga bir sutkada bomba to‘g‘risida 50 ga yaqin yolg‘on xabar kelib tushdi

Hindiston aviakompaniyalari bir sutka ichida ichki hamda tashqi reyslarga bomba qo‘yilgani bo‘yicha 50 ga yaqin yolg‘on xabarlarni oldi. Bu haqda aviatashuvchilarning ma’lumotlariga tayanib, The Economic Times agentligi xabar berdi.

Air India aviakompaniyasi tomonidan amalga oshiriladigan reyslarga sutka davomida bortda portlash sodir bo‘lishi mumkinligi to‘g‘risida 13 ta tahdid kelib tushgan. Akasa Air va Vistara kompaniyalari esa bu turdagi xabarlardan mos ravishda 12 hamda 11 ta qabul qilgan.

Ma’lumotlarga ko‘ra, aviatashuvchilar holat bo‘yicha tegishli organlarni zudlik bilan xabardor qilgan va zarur xavfsizlik choralarini ko‘rgan. Samolyotlarning barchasi qo‘nishni muvaffaqiyatli amalga oshirgan, yo‘lovchilardan hech kimga jarohat yetmagan. Aeroportlarda portlovchi qurilmalarni qidirish bo‘yicha o‘tkazilgan tekshiruvlar davomida samolyotlardan hech narsa topilmagan.

Hindistonda avialaynerlardagi teraktlarga oid yolg‘on ma’lumotlar 14 oktyabrdan boshlab kelib tushmoqda. Ayni vaqtda qadar samolyotlar bortiga bomba qo‘yilgani to‘g‘risida 140 ta yolg‘on xabar berilgan. Ular ham ichki, ham xalqaro yo‘nalishda uchadigan havo kemalariga tegishli. Oxirgi hafta davomida bunday xabarlar qator parvozlarning bekor qilinishiga, shuningdek, uchayotgan samolyotlarning yo‘nalishi o‘zgartirilishiga sabab bo‘ldi. Mahalliy hukumat tahdid manbalarini qidirish bilan shug‘ullanmoqda.

Hindiston hukumati yolg‘on ma’lumot tarqatayotgan insonlarni to‘xtatish va aybdorlarni jazolash maqsadida qator yangi qonunchilik normalarini ishlab chiqish niyatida.