Chechenistonda maxsus kuchlar universitetiga dron hujum qildi. Ramzan Qodirov qasos olishga va’da berdi

29 oktyabr kuni Rossiya maxsus kuchlari universitetiga dron hujum qildi. Hodisa oqibatida universitet tomida yong‘in chiqqan. Rasmiylarning ma’lum qilishicha, bino bo‘sh bo‘lgani sabab hech kimga zarar yetmagan. Putin nomidagi ushbu universitetga 2013 yilda asos solingan bo‘lib, u maxsus kuchlar uchun kadrlarni tayyorlaydigan Rossiyadagi yagona ta’lim muassasasi hisoblanadi.

Checheniston yetakchisi Ramzan Qodirov Gudermesdagi universitetga uyushtirilgan hujumga «ularning tushiga ham kirmagan qasos bilan» javob qaytarishini ma’lum qildi. U frontda jang qilayotgan komandirlariga Ukraina Qurolli kuchlari (UQK) askarlarini «asirga olmaslikni» va «kurashni 100 foizdan ortiqqa oshirishni» buyurdi.

«Ular bizni tishladi, biz ularni yo‘q qilamiz. Yaqin vaqt ichida shunday qasos olamizki, bu ularning tushiga ham kirmagan. Biz bilan hazillashishlariga yo‘l qo‘ymaymiz» — deydi Qodirov.

Checheniston rahbarining taxminicha, ushbu obekt harbiy kadrlar «o‘chog‘i» bo‘lgani uchun tanlangan. UQK unga hujum qilish orqali «qo‘rqitib qo‘ymoqchi bo‘lgan». Ramzan Qodirov endi chechen jangchilari maxsus harbiy operatsiya zonasidagi kurashini ikki barobarga oshirishini va’da qildi.

«Bugun jangda qatnashayotgan barcha komandirlarimga ko‘rsatma berdim: asirga olmaslik, yo‘q qilish va kurashni 100 foizga oshirish. Chechenlar o‘zlarining harbiy imkoniyatlarini hali oshira olishini tushunib yetishsin», — deydi u. Qodirovning qo‘shimcha qilishicha, tergov mazkur hujum qanday yuz berganini aniqlaydi va barcha aybdorlar jazoga tortiladi.