Rossiya Ukraina bo‘ylab yuzlab dronlar uchirdi

Kiyev shahar harbiy ma’muriyati rahbari Timur Tkachenkoning ma’lum qilishicha, shaharning janubi-sharqidagi Darnitskiy tumanida ko‘p qavatli uyga zarar yetgan. Bino konstruksiyasining bir qismi qulagan va vayronalar ostida odamlar qolib ketgan. Hodisa joyiga qutqaruv xizmatlari yuborilgan.

Kiyev meri Vitaliy Klichko ham shaharning boshqa tumanlarida katta vayronagarchiliklar bo‘lganini bildirdi.

Dnipro tumanida dron bo‘laklari besh qavatli uy tomiga tushib, yong‘in keltirib chiqargan. Shu hududda yana bir dron xususiy uyga urilgan.

Kiyev shimolida dron bo‘laklari 12-qavatdagi kvartiraga tushib, yong‘in chiqqan. Shevchenko, Solomenskiy va Obolon tumanlarida noturar binolar shikastlangan.

Solomenskiy tumanida biznes-markaz yonidagi avtoturargohda avtomobil yongan. Darnitskiy tumanida AYoQShda yong‘in chiqqan. Goloseyevskiy tumanida dron bo‘laklari biznes-markaz va yo‘l qismiga tushgan.

So‘nggi ma’lumotlarga ko‘ra, Kiyevda kamida 9 kishi shifoxonaga yotqizilgan, yana ikki nafar jabrlanganga joyida tibbiy yordam ko‘rsatilgan. Qidiruv-qutqaruv ishlari davom etmoqda.

Ukraina Qurolli kuchlari havo kuchlari ma’lumotiga ko‘ra, Rossiya nafaqat Kiyev, balki Xarkiv, Poltava, Sumi, Donetsk, Odessa, Mikolayiv, Dnipropetrovsk va Cherkassi viloyatlariga ham raketa, dron va boshqariladigan aviabombalar yo‘naltirgan.

Ukraina tomonining bildirishicha, o‘tgan sutka davomida Rossiya 892 ta dron uchirgan. Ulardan 710 tasi havo mudofaa tizimlari tomonidan yo‘q qilingan yoki zararsizlantirilgan.

Shuningdek, urush boshlanganidan beri birinchi marta Karpatorti viloyati markazi — Ujgorod shahri ham hujumga uchragani aytilmoqda. Shaharda bir nechta portlash ovozlari eshitilgan.