Qoʻshimcha funksionallar
-
Tungi ko‘rinish
Rossiya dronlari Zaporijjya va Konotopga hujum qildi
Rossiya armiyasi Ukrainaning Zaporijjya va Konotop shaharlariga dronlar orqali hujum uyushtirdi. Hujumlar oqibatida kamida ikki kishi halok bo‘ldi, o‘nlab fuqarolar jarohat oldi, turar joy binolari va fuqarolik infratuzilmasiga zarar yetdi.
Ukraina rasmiylarining ma’lum qilishicha, 4 iyun kuni kechqurun Rossiya harbiylari Zaporijjya shahrining aholi yashash hududiga dronlar bilan zarba bergan. Hujum natijasida ko‘p qavatli turar joy binosi va uning atrofidagi avtomobillarga shikast yetgan.
Zaporojye viloyati harbiy ma’muriyati rahbari Ivan Fedorovning bildirishicha, hujum oqibatida 44 yoshli ayol halok bo‘lgan. Shuningdek, yana 11 kishi turli darajada tan jarohati olgan.
Shu kuni kechqurun Rossiya qo‘shinlari Sumi viloyatidagi Konotop shahriga ham dronlar bilan zarba bergan. Shahar meri Artyom Semenixinning ma’lum qilishicha, hujumlar turar joylar va fuqarolik infratuzilmasini nishonga olgan.
Zarba oqibatida kamida besh kishi jabrlangan. Ular orasida uch nafar bola ham bor. Dron hujumi tufayli xususiy uylardan biri yong‘in ichida qolgan. Hodisa vaqtida uyda ikki nafar katta yoshli kishi va uch nafar bola bo‘lgan.
Mahalliy hokimiyat ma’lumotiga ko‘ra, jabrlangan bolalar hamda ularning onasi shifoxonaga yotqizilgan. Shuningdek, hujum oqibatida shaharning bir qismi elektr ta’minotisiz qolgan, suv ta’minotida ham uzilishlar yuzaga kelgan.
Xerson shahrida ham dron hujumi qayd etilgan. Xerson viloyati harbiy ma’muriyati rahbari Aleksandr Prokudinning bildirishicha, shaharning Korabel tumaniga qilingan zarba natijasida 75 yoshli erkak halok bo‘lgan.
Ukraina rasmiylari hujumlar fuqarolik obektlari va aholi yashash hududlariga qarshi amalga oshirilganini ta’kidlamoqda.
