Toshkentda metro stansiyasida hojatini chiqargan erkak bo‘yicha ma’lumot berildi

Ijtimoiy tarmoqlarda noma’lum erkak metropolitenda hojatini chiqarib ketgani tasvirlangan video keng tarqalmoqda. Toshkent metropoliteni mazkur holat yuzasidan ma’lumot berdi.

Ma’lum qilinishicha, videodagi holat 27 sentabr kuni sodir bo‘lgan. Shundan so‘ng huquq-tartibot idoralari xodimlari tomonidan ushbu fuqaroning shaxsiga aniqlik kiritilgan.

«Ayni vaqtda belgilangan tartibda fuqaroga nisbatan tergovga qadar surishtiruv ishlari amalga oshirilmoqda. Shu o‘rinda yo‘lovchilardan metropolitendan foydalanish vaqtida belgilangan tartib-qoidalarga amal qilish va tozalikka rioya qilishlarini so‘raymiz», — deyiladi xabarda.

Eslatib o‘tamiz, 2022 yil 23 fevralda «Chilonzor» metro bekatida ona-bola xonasi va hojatxona ishga tushirilgan edi. O‘shanda Toshkent metropoliteni ona-bola xonasi hamda hojatxona sinov tariqasida qurilgani, natija kutilganidek bo‘lsa, yo‘lovchilar oqimi ko‘p bo‘lgan yana 14 ta metro bekatida ham barpo etilishini ma’lum qilgandi.