Rossiya elchixonasi rus OAV vakillarini O‘zbekiston qonunlariga rioya qilishga chaqirdi

Rossiyaning O‘zbekistondagi elchixonasi mamlakatga tashrif buyurayotgan rus OAV vakillarini qonunlarga rioya qilishga chaqirdi.

«Rossiya OAVning O‘zbekistondagi faoliyati davomida ba’zida yuzaga keladigan muammoli vaziyatlar sabab yana bir bor ushbu mamlakat qonunlariga qat’iy rioya qilishlari kerakligini eslatib o‘tamiz.

Xususan, O‘zbekiston hududida o‘z faoliyatini amalga oshirishni rejalashtirayotgan jurnalist va blogerlar mamlakatga safar qilishdan oldin O‘zbekiston Tashqi ishlar vazirligidan tegishli akkreditatsiyadan o‘tishi kerak», — deyiladi elchixona xabarida.

Avvalroq ijtimoiy tarmoqlarda rossiyalik bloger va jurnalist Aleksey Pivovarov hamda uning suratga olish guruhi Nukusda huquq-tartibot organlari tomonidan ushlab turilgani to‘g‘risida xabarlar tarqalgandi. Rossiya elchixonasi holatga aniqlik kiritish maqsadida O‘zbekiston Tashqi ishlar vazirligi bilan bog‘langanini ma’lum qilgan.

O‘zbekiston prezidenti huzuridagi Axborot va ommaviy kommunikatsiyalar agentligining Qoraqalpog‘iston bo‘yicha hududiy boshqarmasi holat yuzasidan izoh bergan.

«Dastlabki tekshiruv natijasida xorijiy jurnalistlar faoliyati O‘zbekiston Respublikasi Tashqi ishlar vazirligida oldindan akkreditatsiyadan o‘tmasdan amalga oshirilgani aniqlandi, bu amaldagi qonunchilikni buzish hisoblanadi», — deyiladi xabarda.

Aleksey Pivovarov – taniqli telejurnalist, NTV va boshqa telekanallarda ishlagan, so‘nggi yillarda possovet va uzoq xorij mamlakatlari haqida bir qator ko‘rsatuvlar e’lon qilgan «Redaksiya» YouTube kanali muallifi.