Ukraina Daniyadan F-16 qiruvchi samolyotlarining ikkinchi partiyasini qabul qilib oldi

Prezident Volodimir Zelenskiy qiruvchi samolyotlarni Ukrainaga berishda Daniyaning yetakchiligini ta’kidlab, boshqa ittifoqchi davlatlarni ham undan o‘rnak olishga chaqirdi.

Daniya Ukraina Qurolli kuchlariga F-16 qiruvchi samolyotlarining ikkinchi partiyasini topshirdi. Bu haqda Ukraina prezidenti Volodimir Zelenskiy ma’lum qildi.

Zelenskiyning so‘zlariga ko‘ra samolyotlar hozir Ukrainada.

«Birinchi partiyadagi samolyotlar allaqachon Rossiya raketalarini urib tushirmoqda va odamlarimiz, infratuzilmamizni qutqaryapti», — deb yozadi Zelenskiy o‘zining Telegramʼdagi kanalida. O‘z navbatida u qiruvchi samolyotlarni topshirishda Daniyaning yetakchiligini ta’kidlab, boshqa ittifoqchi davlatlarni ham undan o‘rnak olishga chaqirdi.

Ukarina OAVga ko‘ra, Daniya jami 19 ta F-16 qiruvchi samolyotlarini topshirishni rejalashtirgan.

Daniya va Niderlandiyadan ushbu samolyotlarning birinchi partiyasi yetkazib berilishi haqida 2024 yilning avgustida xabar berilgandi. O‘sha oyning o‘zida bitta F-16 yo‘qotilgani, uni boshqargan tajribali uchuvchi Aleksey Mes esa halok bo‘lgani ma’lum qilingan edi.

#Daniya #F-16 #Volodimir Zelenskiy