Zelenskiy: G7 yordami bilan Rossiyani tinchlikka majbur qilamiz

24 iyun kuni kechqurun xalqqa murojaat qilgan Ukraina prezidenti Volodimir Zelenskiy mamlakat xalqaro hamkorlar, xususan G7 davlatlari bilan muhokama qilingan yordam paketini olishga katta umid qilayotganini bildirdi.

Uning so‘zlariga ko‘ra, mazkur yordam Ukrainaga Rossiyani tinchlik muzokaralariga majbur qilish imkonini beradi. Biroq Zelenskiy qanday turdagi yordam nazarda tutilayotganiga aniqlik kiritmadi.

Prezidentning ta’kidlashicha, G7 mamlakatlari Kiyev qanday yordam haqida gapirayotganini yaxshi biladi va Ukraina bu qo‘llab-quvvatlash o‘z vaqtida taqdim etilishiga ishonmoqda.

Zelenskiy, shuningdek, Ukraina razvedkasi va qurolli kuchlariga Rossiya urush ko‘lamini kengaytirish uchun foydalanayotgan obektlarga nisbatan oldindan zarba berish bo‘yicha topshiriq berganini ma’lum qildi.

So‘nggi haftalarda Ukraina Rossiya hududidagi energetika infratuzilmasi va harbiy ta’minot uchun muhim ahamiyatga ega obektlarga, ayniqsa neftni qayta ishlash zavodlari (NQZ)ga zarbalarni kuchaytirdi. Bunday hujumlar Moskva, Nijnekamsk, Tyumen va Volgograddagi yirik obektlarga ham qaratilgan.

Ukraina tomonining ma’lum qilishicha, ushbu hujumlar ortidan Rossiyaning ko‘plab hududlarida yonilg‘i tanqisligi yuzaga kelgan, benzin va dizel narxi keskin oshgan. Zelenskiyning iddaosiga ko‘ra, hozir bunday muammolar Rossiyaning 60 dan ortiq hududida kuzatilmoqda.

Uning fikricha, bu vaziyat Rossiyani Moskva viloyati, Valdaydagi prezident qarorgohi va Qrim ko‘prigi atrofini qo‘shimcha havo hujumidan mudofaa tizimlari bilan kuchaytirishga majbur qilgan. Bu esa boshqa yo‘nalishlardagi havo mudofaasini zaiflashtirmoqda.

Zelenskiy Rossiya prezidenti Vladimir Putinni urushni yakunlash bo‘yicha takliflarni qabul qilmayotganlikda aybladi. Uning ta’kidlashicha, Kiyev bir necha bor uchrashuv va haqiqiy tinchlik muzokaralarini taklif qilgan, ammo Moskva bunga rozilik bermagan.

Shu kuni Germaniya kansleri Fridrix Mers ham Bundestagdagi chiqishida Putin Zelenskiyning tinchlik muzokaralarini boshlash haqidagi aniq taklifini rad etganini eslatdi.

Shu bilan birga, Reuters agentligi ma’lumotlariga ko‘ra, Ukraina zarbalari oqibatida Rossiyada benzin ishlab chiqarish ichki talabning taxminan 80 foizinigina qoplamoqda. Hozirda benzin va dizel sotilishiga rasmiy cheklovlar mamlakatning 24 ta hududida amal qilmoqda. Qo‘shib olingan Qrim va Sevastopolda yonilg‘i savdosi vaqtincha to‘xtatilgan, Rossiya nazoratidagi Luxansk viloyatining ayrim hududlarida esa bir xaridorga 20 litrdan ortiq yonilg‘i sotish taqiqlangan.

Energy Intelligence tahlilchilari Rossiya energetika infratuzilmasiga qarshi olib borilayotgan hujumlar mamlakat tarixidagi eng yirik yonilg‘i inqirozlaridan biriga sabab bo‘lishi mumkinligini qayd etgan.

Shu munosabat bilan Rossiya Qozog‘istondan 50 ming tonna AI-92 benzini sotib olish imkoniyatini muhokama qilayotgani haqida xabarlar tarqaldi. Biroq Qozog‘iston Energetika vazirligi Moskvadan rasmiy so‘rov kelib tushmaganini ma’lum qildi. Rossiya Energetika vazirligi esa bu ma’lumotlarga hozircha munosabat bildirmagan.