«Oq dubulg‘alilar»: Saydnaya qiynoqqa solish qamoqxonasida mahbuslar qolmadi

10 dekabr, seshanbaga o‘tar kechasi «Oq dubulg‘alilar» nodavlat notijorat tashkiloti tarqatgan bayonotga ko‘ra, Bashar Asad rejimining shafqatsizligi ramziga aylangan Damashq shimolidagi Saydnaya harbiy qamoqxonasida mahbuslar qolmadi. Tashkilot ko‘ngillilari qamoqxona binosini tintuv qilishdi.

Asad rejimi ag‘darilib, isyonchi kuchlar qamoqxonaga bostirib kirganidan so‘ng, bedarak yo‘qolgan mahbuslarning ko‘plab yaqinlari uning yashirin kameralari va maxfiy xonalarida omon qolgan mahbuslar bo‘lishi mumkinligini taxmin qilishdi. Qidiruvga beshta guruh, jumladan, o‘qitilgan politsiya itlaridan iborat ikki guruh va qamoqxona bilan tanish bo‘lgan insayderlar jalb qilingan. «Barcha kirish, chiqish, ventilyatsiya shaxtalari, drenaj tizimlari, suv quvurlari, kabel kanallari va kuzatuv kameralari tekshirildi. Ushbu keng ko‘lamli sa’y-harakatlarga qaramay, hech qanday yashirin yoki yopiq joylar topilmadi», — deyiladi «Oq dubulg‘alilar» bayonotida.

Tashkilot rahbari Rayed Salehga ko‘ra, qamoqxonada jami 150 mingga yaqin kishi saqlangan. U suriyaliklar orasida qo‘riqchilarning shafqatsizligi va qiynoqlari bilan mashhur edi, shuning uchun uni «so‘yishxona» deb atashgan. Mahbuslar orasida minglab begunoh fuqarolar ham bor edi. Yo‘qolgan mahbuslarni qidirish davom etmoqda va ko‘plab noma’lum jasadlar Saydnaya qamoqxonasi tashqarisida qolmoqda.

Suriya razvedkasi ikki zobiti AQShda urush jinoyatlarida ayblandi

9 dekabr, dushanba kuni AQSh Adliya vazirligi Suriya harbiy-havo kuchlarining ikki sobiq zobitiga qarshi ayblov xulosasini e’lon qildi. 72 yoshli Jamil Hasan va 65 yoshli Abdul Salom Mahmud «Al Mezza harbiy aeroportidagi (Al Mezza qamoqxonasi) hibsxonalarda mahbuslar, jumladan, AQSh fuqarolariga nisbatan shafqatsiz va g‘ayriinsoniy munosabatda bo‘lganlikda» ayblanmoqda. Hasan va Mahmudni hibsga olish uchun orderlar allaqachon chiqarilgan, ammo ular hozircha ozodlikda qolmoqda, deya aniqlik kiritdi AQSh Adliya vazirligi.