Tramp «qasos olish» bilan tahdid qilgan shaxslarni Bayden oldindan afv etdi

Jo Bayden 20 yanvar kuni AQSh Qurolli kuchlari shtab boshliqlari birlashgan qo‘mitasining sobiq rahbari Mark Milli, mamlakatning sobiq bosh infeksionisti Entoni Fauchi, 2020 yil yanvarda Kapitoliyga uyushtirilgan hujumni tergov qilgan Vakillar palatasi qo‘mitasi a’zolari va xodimlarini afv etdi.

Qayd etilishicha, bu bilan Bayden AQShning saylangan prezidenti Donald Tramp administratsiyasi tomonidan ushbu shaxslarning «siyosiy sabablarga ko‘ra ta’qib qilinishi»ga qarshi turmoqchi.

«Odamlar hatto hech qanday yomon ish qilmagan va aslida to‘g‘ri yo‘l tutgan bo‘lsa-da, oxir-oqibat oqlanayotganiga qaramay, tergov yoki sud ta’qibi faktining o‘zi ularning obro‘si va moliyaviy ahvoliga mislsiz zarar yetkazishi mumkin», — degan Bayden.

Jo Bayden hali tergov boshlanmagan shaxslarni afv etishni rejalashtirgani haqida Associated Prses manbalari xabar bergandi. Agentlikning yozishicha, Donald Trampga qarshi chiqqanlarga jinoiy ish ochish bilan tahdid qilgan bo‘lajak administratsiyadan «qo‘rquvga tushgan ayrim sobiq amaldorlar Oq uyga murojaat qilgan». Xususan, COVID-19 pandemiyasi vaqtida mamlakatdagi vaziyatni muvofiqlashtirishga yordam bergan Entoni Fauchi Donald Trampning sog‘liqni saqlash sohasidagi zarur chora-tadbirlar to‘g‘risidagi bayonotini qo‘llab-quvvatlashdan bosh tortgan.

Avvalroq AQSh prezidenti Jo Bayden giyohvand moddalar bilan bog‘liq jinoyatlarni sodir etgani uchun qamalgan qariyb 2,5 ming kishini afv etgandi. Dekabr oxirlarida esa AQSh prezidenti federal sudlar tomonidan o‘limga hukm qilingan 37 nafar mahbusning jazosini yengillashtirgan edi.