Britaniyada uch qizni o‘ldirgan shaxs 52 yilga qamaldi

Aksel Rudakuban Liverpul qirollik sudida Sautport chekkasida uch nafar qizni o‘ldirganlikda ayblanib, umrbod qamoq jazosiga hukm qilindi. Bu haqda 23 yanvar, payshanba kuni Buyuk Britaniya Bosh prokuraturasiga tayanib, AFP agentligi xabar berdi.

Sudlanuvchi, ruandalik o‘smir jinoyat vaqtida 17 yoshda bo‘lganligi sababli, unga nisbatan jazoni to‘liq qo‘llash mumkin emas. Shu bois sud uni tergov davomida hibsda o‘tkazgan vaqtini 52 yildan chegirib tashlagan holda 51 yil 190 kunga ozodlikdan mahrum qildi. Sudyaning so‘zlariga ko‘ra, yigitning qachondir ozod etilishi dargumon.

Rudakuban qizlarni o‘ldirishdan tashqari yana 13 ta jinoyatda aybdor deb topildi. Xususan, bu yana o‘n kishini, jumladan sakkiz bolani o‘ldirishga urinish, shuningdek, ritsin ishlab chiqarish va «Al-Qoida» terrorchilik tashkiloti uchun o‘quv qurolini saqlashdir.

Bolalarning o‘ldirilishi ommaviy noroziliklarga sabab bo‘ldi

2024 yil 29 iyulda Rudakubana Sautport kurort shahridagi 6 yoshdan 11 yoshgacha bo‘lgan bolalar uchun mo‘ljallangan Hart Space Studious raqs studiyasiga pichoq bilan hujum qildi. Hujum oqibatida uch qiz halok bo‘lgan. Yana sakkiz nafar bola va ikki katta yoshli kishi pichoqlangan.

Hujum Buyuk Britaniya bo‘ylab keng tarqalgan tartibsizliklarga sabab bo‘ldi. Sautportda namoyishchilar masjidga hujum qildi, politsiyaga toshlar otdi va mashinalarni yoqib yubordi. Politsiyaning aytishicha, zo‘ravonlik o‘ta o‘ng "Angliya mudofaa ligasi" guruhi tomonidan amalga oshirilgan.