Saida Mirziyoyeva Jahon savdo tashkilotiga a’zolik jarayoni haqida ma’lumot berdi

O‘zbekiston Jahon savdo tashkilotiga a’zo bo‘lish yo‘lida o‘tgan yili katta qadam tashladi, bu yil ham ishlar shu sur’atda davom ettiriladi, deya ma’lum qildi prezident yordamchisi Saida Mirziyoyeva.

“O‘tgan yili JST Ishchi guruhi ikkita muhim yig‘ilish o‘tkazdi. Bu bizga a’zolikning asosiy hujjati – Ishchi guruh Hisoboti loyihasini tayyorlashga kirishishga imkon berdi. Shuningdek, AQSh, Xitoy va Yaponiya kabi 15 ta mamlakat bilan ikki tomonlama muzokaralar yakunlandi. Natijada O‘zbekiston hisobida 23 ta imzolangan bitim bor.

Qisqa vaqt ichida biznesni va raqobatni yanada shaffof qilish uchun 20 ta muhim qonun qabul qilindi.

Tez orada Tashkilotning to‘laqonli a’zosi bo‘lish uchun joriy yilda ham biz shu sur’atda davom etamiz. Bu mamlakatimizning investitsion jozibadorligini oshirishi hamda o‘zbek biznesining mintaqaviy va global qo‘shilgan qiymat zanjirlariga kirib borishini ta’minlashi lozim.

JSTga a’zolik va davlat rahbari tomonidan olib borilayotgan islohotlarning yakuniy maqsadi – shubhasiz, xalqimiz farovonligini ta’minlash, unga munosib ish o‘rinlarini yaratish va iqtisodiyot boshqaruvini samaraliroq tizimga o‘tkazishdir”, – deya yozdi Mirziyoyeva o‘z Telegram-kanalida.

Eslatib o‘tamiz, Jahon savdo tashkilotiga a’zo bo‘lishning talablaridan biri 1 yanvardan boshlab bajarildi: eksportchilarning transport xarajatlarini kompensatsiya qilish to‘xtatildi, ularga foyda solig‘i va aylanmadan soliq bo‘yicha berilgan imtiyozlar bekor qilindi.