Ukrainaga birinchi «Mirage 2000» qiruvchi samolyoti yetkazildi

Fransiya mudofaa vaziri Sebastyan Lekornyu Ukrainaga birinchi «Mirage 2000» qiruvchi samolyoti yetkazilganini ma’lum qildi. Uni Fransiyada bir necha oy davomida tayyorgarlikdan o‘tgan ukrainalik uchuvchilar boshqaradi.

Samolyot modernizatsiya qilingan: zamonaviy uskunalar, shu jumladan yangi radioelektron urush tizimlari va «havo-yer» raketalari bilan jihozlangan.

2024 yil iyun oyida Fransiya prezidenti Emmanuel Makron «Mirage 2000-5» qiruvchi samolyotlarini Ukrainaga berishga tayyorligini ma’lum qildi, biroq, ularning sonini aytmadi.

La Tribune nashrida e’lon qilingan ma’lumotlarga ko‘ra, ta’minot hajmi cheklangan. Fransiya ko‘pi bilan oltita qiruvchi samolyotni ajratishi mumkin, chunki mavjud bo‘lgan 26 samolyotdan 20 tasi faol eskadronning bir qismi. Samolyotlar sonini ko‘paytirish uchun boshqa mamlakatlarni jalb qilish rejalashtirilgan edi, Ukrainaga beriladigan «mirajlarning» umumiy soni o‘n ikkidan oshmasligi kerak.

Ukrainalik harbiy ekspert Aleksandr Kovalenko The Insider nashriga bergan sharhida «Mirage 2000-5» samolyotlariga texnik xizmat ko‘rsatish va ta’mirlash muayyan qiyinchiliklar bilan bog‘liq bo‘lishini, biroq o‘z xususiyatlariga ko‘ra ular Amerikaning F-16 va Ukrainaning Su-24 samolyotlaridan ustun ekanini ta’kidladi.