"Uy-joyning yagona hayot sikli" tamoyili joriy etilmoqda

Uy-joy va noturar joy obektlarni ulushli ishtirok asosida qurish jarayonida fuqarolarning huquq va qonuniy manfaatlarini kafolatlash uchun quyidagilarni nazarda tutuvchi "Uy-joyning yagona hayot sikli" tamoyili joriy etilmoqda:

• uy-joy va noturar joy obektlarni ulush kiritish asosida qurish jarayonida jismoniy va yuridik shaxslar (ulushdor) huquqlarini himoya qilishni ta’minlash;
• mavjud yer resurslaridan samarali (intensiv) foydalangan holda uy-joy qurilishini tashkil etish;
• uy-joy qurilishi sohasidagi investitsiya loyihalarini amalga oshirish muddatlarini qisqartirish;
• uy-joylarni ulush kiritish va ipoteka krediti asosida sotib olishning ishonchli va samarali imkoniyatini yaratish;
• uy-joy qurilishida energiya tejamkor qurilish materiallaridan foydalanishni ommalashtirish.

"Uy-joyning yagona hayot sikli" tamoyili doirasida 2025 yil 1 iyuldan boshlab qurilish-pudrat tashkilotlari, developerlar va buyurtmachilar (quruvchilar) tomonidan obektlarni qurishda ulushdorlarning pul mablag‘larini jalb qilish faqat kadastr organlarida davlat ro‘yxatidan o‘tkazilgan, notarial tasdiqlangan ulushli ishtirok asosidagi qurilish shartnomasi asosida amalga oshiriladi.