Ko‘p kvartirali uylarda yashovchilar soni avval aytilgan rasmiy raqamlardan ancha kamligi ma’lum bo‘ldi

O‘zbekiston aholisining mutlaq aksariyati – 86 foizi hovli uylarda, 12 foizi ko‘p kvartirali uylardagi xonadonlarda istiqomat qiladi.

Toshkent shahrida esa aholining 45 foizi hovli uylarda, 51 foizi ko‘p kvartirali uylarda yashamoqda.

Ushbu manzara aholini ro‘yxatga olishning dastlabki natijalaridan ma’lum bo‘ldi.

Milliy statistika qo‘mitasi hisobotiga ko‘ra, 2026 yil boshida ro‘yxatga olingan 39 mln 47 ming aholining turar joy turlari bo‘yicha taqsimlanishi quyidagicha:

• shaxsiy yakka tartibdagi hovli va dala hovli – 33 mln 689 ming;

• ko‘p qavatli uydagi xonadon – 4 mln 826 ming;

• talaba va o‘quvchilar yotoqxonasi – 61 ming;

• boshqa yotoqxonalar – 63 ming;

• yashash uchun foydalaniladigan noturar joy – 58 ming;

• mehmonxona, oilaviy mehmon uyi, hostel – 3,5 ming;

• boshqa turdagi turar joy – 347 ming.

Qayd etish lozim, 2026 yil 14 yanvar kuni ko‘p kvartirali uylarni boshqarish sohasi bo‘yicha davlat rahbariga qilingan takliflar taqdimotida respublika bo‘ylab 44 mingdan ortiq ko‘p kvartirali uyda 7,1 mln aholi istiqomat qilishi aytilgan edi. Ro‘yxatga olish natijasida esa, ko‘p kvartirali uylarda yashovchilar soni 4,8 mln ekani oydinlashdi.

Ko‘p kvartirali uylarda yashovchilar

Ro‘yxatga olish natijalariga ko‘ra, poytaxt Toshkentda doimiy yashovchilar soni 3 mln 225 ming nafarni tashkil etgan. Shundan 1 mln 454 mingga yaqini (45 foizi) hovli uylarda, 1 mln 655 ming nafari (51 foizi) esa ko‘p kvartirali uylarda yashaydi.

Ko‘p kvartirali uylarda yashovchilar soni Toshkent viloyatida 605 ming, Farg‘ona viloyatida 429 ming, Samarqand viloyatida 306 ming, Navoiy viloyatida 301 ming, Andijon viloyatida 203 ming, Buxoro viloyatida 202 ming nafarni tashkil etadi.

Urbanizatsiya

Aholini ro‘yxatga olishning dastlabki natijalariga qaraganda, O‘zbekiston aholisining 21,3 mln nafari yoki 54,5 foizi shaharlarda, 17,8 mln nafari yoki 45,5 foizi esa qishloq joylarda yashaydi.

Poytaxt Toshkentdan keyin eng ko‘p shaharlashgan (aholisi tarkibida shaharda yashovchilar ulushi eng yuqori) hudud – Namangan viloyati. Bu viloyat aholisining 66,2 foizi shaharlarda istiqomat qiladi.

Navoiy (59,3 foiz), Farg‘ona (56,2 foiz), Andijon (52,2 foiz), Jizzax (51,4 foiz) va Toshkent viloyatlarida (58,7 foiz) ham aholining yarmidan ko‘pi shaharlarda yashamoqda.

Xorazm viloyati aholisining 61,9 foizi qishloqlarda hayot kechiryapti. Qishloq aholisining ulushi Samarqand viloyatida 60,1 foiz, Surxondaryo viloyatida 59,4 foiz, Buxoro viloyatida 57,5 foizni tashkil etadi.