Bloomberg: Putin Ukraina bo‘yicha AQSh bilan muzokaralarga «og‘ir vaznlilar jamoasi»ni jalb etadi

Vladimir Putin Rossiya—Ukraina urushini yakunlash bo‘yicha AQSh vakillari bilan muloqot qilishga «muzokaralar o‘tkazish bo‘yicha ko‘p yillik tajribaga ega og‘ir vaznlilar jamoasi»ni shakllantirmoqda, deb xabar beradi Bloomberg.

Agentlik manbasining ma’lum qilishicha, muzokara o‘tkazishga mas’ul bo‘ladiganlar guruhiga RF prezidentining tashqi siyosiy masalalar bo‘yicha maslahatchisi Yuriy Ushakov, Rossiya Tashqi razvedka xizmati direktori Sergey Narishkin va Rossiya to‘g‘ridan-to‘g‘ri investitsiyalar jamg‘armasi bosh direktori Kirill Dmitriyev kiritilgan.

Bloombergʼning qayd etishicha, Ushakov va Narishkin Ukraina bilan o‘t ochishni to‘xtatish bo‘yicha birinchi muzokaralarda ishtirok etgan. Dmitriyev esa o‘z navbatida 2025 yil fevralda amerikalik maktab o‘qituvchisi Mark Fogelning ozod etilishida qatnashgan.

Rossiya guruhidan, shuningdek, 2022 yilda o‘tkazilgan muzokaralarning boshqa ishtirokchilari ham o‘rin olishi mumkin. Agentlikning Kremlga yaqin manbasining so‘zlariga ko‘ra, ular muzokaralarda Ukraina vakillariga yordam beradi. Jumladan, ular orasiga RF prezidentining yordamchisi Vladimir Medinskiy ham kiritilish ehtimoli mavjud.

Dmitriyev matbuot xizmati uning tinchlik muzokaralaridagi ishtirokiga izoh berishdan bosh tortdi. Kreml ham Bloomberg so‘roviga javob qaytarmagan.

Avvalroq Volodimir Zelenskiy Ukraina o‘z ishtirokisiz hech qanday ikki tomonlama tinchlik muzokaralarini qabul qilmasligini aytgandi. Bundan tashqari, Ukraina prezidenti Yevropa davlatlarining bo‘lajak tinchlik muzokaralarida ishtirok etishidan «juda manfaatdor» ekanini ma’lum qilgan.