YeI yetakchilari Ukrainadagi urush bo‘yicha favqulodda sammit o‘tkazishni rejalashtirmoqda

Yevropa davlatlari yetakchilari Ukrainadagi urushni yakunlash va yagona pozitsiyani ishlab chiqish imkoniyatini muhokama qilish maqsadida Parijda favqulodda sammit o‘tkazish niyatida. Bunga AQSh Rossiya bilan tinchlik muzokaralariga Yevropa davlatlari ishtirokisiz tayyorgarlik ko‘rayotgani sabab bo‘lmoqda.

Yelisey saroyi hozircha uchrashuv haqida rasmiy xabar bermadi, ammo alohida yetakchilar undagi ishtirokini allaqachon tasdiqlagan. Ular orasida Buyuk Britaniya bosh vaziri Kir Starmer ham bor. «Biz Rossiya tomonidan jiddiy tahdidga duch kelyapmiz va Yevropa Ukraina kelajagini ta’minlashi uchun NATOda nisbatan ahamiyatli rolni o‘ynashi kerak. Buyuk Britaniya AQSh va Yevropa birligiga erishish niyatida», — deydi Starmer. Shuningdek, u hozirgi tashqi tahdidlar sharoitida alyans ichida kelishmovchiliklarga yo‘l qo‘yib bo‘lmasligini ta’kidlagan.

Parij sammitidan keyin Starmer Vashingtonda AQSh prezidenti Donald Tramp bilan uchrashishni rejalashtirmoqda. Shundan keyin Ukraina prezidenti Volodimir Zelenskiy ishtirokida Yevropa yetakchilari yana bir uchrashuv o‘tkazadi.

NATO bosh kotibi Mark Ryutte ham sammitda qatnashish niyatida. Xavfsizlik bo‘yicha Myunxen konferensiyasida chiqish qilgan Ryutte Yevropa AQSh tashabbusi bilan amalga oshirilayotgan tinchlik jarayonida faol ishtirok etmoqchi bo‘lsa, aniq takliflarni bildirishi kerakligini aytgan. «Agar yevropaliklar ovoz huquqiga ega bo‘lishni istashsa, ular o‘zlarining ahamiyatini namoyish etishlari kerak», — deydi Ryutte.

Parijda sammit o‘tkazilishi to‘g‘risida birinchi bo‘lib, Polsha tashqi ishlar vaziri Radoslav Sikorskiy xabar berdi. Uning ta’kidlashicha, Fransiya prezidenti Emmanuel Makron «allaqachon Yevropa yetakchilarini Parijga taklif qilgan».

Finlandiya prezidenti Aleksandr Stubbga ko‘ra, AQSh Davlat departamenti yevropalik sheriklarini Ukrainani harbiy jihatdan qo‘llab-quvvatlash bo‘yicha taklif ishlab chiqishga chaqirgan.