Braziliya Bosh prokuraturasi sobiq prezident Bolsonaruni davlat to‘ntarishiga urinishda aybladi

Braziliya Bosh prokuraturasi sobiq prezident Jair Bolsonaruni 2022 yilda davlat to‘ntarishini uyushtirishga uringanlikda aybladi, deb xabar beradi G1 telekanali.

Prokuraturaning hisoblashicha, Bolsonaru Braziliyadagi demokratik rejimni ag‘darishga uringan tashkilot yetakchisi bo‘lgan. Ayblovlarga ko‘ra, 69 yoshli Bolsonaru o‘z vorisi — prezident Luis Inatsiu Lula da Silvani zaharlashni va Oliy sud sudyasi Aleksandr de Morayesni otib o‘ldirishni rejalashtirgan.

Sobiq prezident siyosiy ta’qiblar qurboni bo‘lganini aytmoqda. Siyosatchiga advokatlik qilayotganlarning ta’kidlashicha, u hech qachon Braziliyadagi demokratik qonun ustuvorligini yoki uni qo‘llab-quvvatlovchi institutlarni yo‘q qilishga qaratilgan harakatlarni olib bormagan.

2024 yil noyabrda Braziliya politsiyasi Bolsonaruning da Silvaga qarshi fitnaga aloqadorligi bo‘yicha ayblovni ilgari surgandi. Umumiy hisobda 34 kishiga nisbatan ayblov qo‘yilgan. Bosh prokuratura qarorini Oliy sud ko‘rib chiqishi kerak. Da’vo ma’qullansa, Bolsonaru jinoyat ishi doirasida sud qarshisiga turishga majbur bo‘ladi.

Bolsonaru 2019 yildan 2023 yilgacha Braziliya prezidenti bo‘lgan va da Silva uning o‘rniga kelgan edi. Siyosatchi mag‘lubiyatini tan olmagan, lekin lavozimini tark etgan. 2023 yil yanvar oyi boshida natijalardan norozi Bolsonaru tarafdorlari Braziliya poytaxtida norozilik namoyishlari va tartibsizliklar uyushtirgan, jumladan, hukumat binolarini egallab olishga uringan. Namoyishlar kuchishlatar tuzilmalar vakillari tomonidan bostirilgan, Bolsonaruning o‘zi esa 2018 yilda olgan jarohati bahonasida AQShga ketib qolgandi.

Bolsonaru davlat to‘ntarishiga urinish borasidagi ayblovlarni rad etgan va norozilik namoyishchilarini qoralagan. U mamlakatga 2023 yil martda qaytib kelgan va muxolifatga boshchilik qilmasligini ta’kidlagan.