Ikkinchi jahon urushida qozonilgan g‘alabaning 80 yilligi hamda «Xotira va qadrlash kuni» keng miqyosda nishonlanadi

«Ikkinchi jahon urushida qozonilgan g‘alabaning 80 yilligi hamda Xotira va qadrlash kuniga tayyorgarlik ko‘rish va munosib nishonlash to‘g‘risida»gi prezident qarori qabul qilindi.

Unga ko‘ra, Ikkinchi jahon urushida qozonilgan g‘alabaning 80 yilligi hamda «9 may – Xotira va qadrlash kuni» «Vatan ravnaqi, tinchligi va himoyasi yo‘lidagi qahramonlik unutilmaydi» shiori ostida o‘tkaziladi.

Urush qatnashchilari va front orti mehnat faxriylari, mustaqilligimizni mustahkamlash, xalqimiz tinchligi, mamlakatimiz ravnaqi yo‘lida jasorat va fidoyilik ko‘rsatgan yurtdoshlarni xotirlash, ayni vaqtda hayot bo‘lgan mehnat faxriylari va keksalarga hurmat-ehtirom ko‘rsatishga qaratilgan tadbirlar o‘tkaziladi.

Yolg‘iz va kam ta’minlangan urush qatnashchilarining yashash joyini ta’mirlash, obodonlashtirish bo‘yicha tegishli chora-tadbirlar amalga oshiriladi.

Urush qatnashchisi va uning oqibatida nogiron bo‘lgan shaxslar, front orti mehnat faxriylari, mustaqillik yillarida xizmat burchini bajarish chog‘ida halok bo‘lgan yoki nogiron bo‘lib qolgan harbiy xizmatchilar va huquqni muhofaza qiluvchi organlar xodimlari hamda ularning oila a’zolariga moddiy va ma’naviy yordam ko‘rsatiladi.

Urush qatnashchilari va uning oqibatida nogiron bo‘lgan shaxslarga, front orti mehnat faxriylariga «Ikkinchi jahon urushidagi g‘alabaning 80 yilligi» yubiley medali topshiriladi.

Urush qatnashchilari va front orti mehnat faxriylariga xohishga ko‘ra respublika hududidagi sanatoriylarga bir nafar kuzatuvchisi bilan bir martalik bepul yo‘llanma taqdim etiladi.