Gurjiston parlamenti «Chet el agentlari» to‘g‘risidagi ikkinchi qonunni ma’qulladi

Hukmron «Gurjiston orzusi» (GO) partiyasidan a’zolarni o‘z ichiga olgan Gurjiston parlamenti 1938 yilda qabul qilingan AQShning xorijiy agentlarni ro‘yxatga olish to‘g‘risidagi qonuni tarjimasi bo‘lgan qonun loyihasini ma’qulladi. Bu haqda 4 mart, seshanba kuni Gurjistonning Tabula portali xabar berdi.

Unga ko‘ra, qonun loyihasi birinchi o‘qishda qabul qilindi. Hukmron partiyadan 84 deputat yoqlab ovoz berdi. Hech kim qarshi chiqmadi. Oktyabr oyidagi saylovlarni soxtalashtirilgan deb hisoblagan muxolifat parlament ishini boykot qilmoqda.

Jismoniy shaxslar ham «chet el agenti» sifatida tan olinishi mumkin

«Gurjiston orzusi» deputati va parlamentning huquq qo‘mitasi rahbari Archil Gorduladzening aytishicha, Gurjistonning xorijiy agentlarni ro‘yxatga olish to‘g‘risidagi yangi qonuni «Amerika qonunining batafsil tarjimasi». Uning eslatishicha, «Chet el ta’sirining shaffofligi to‘g‘risida»gi qonun Gurjistonda 2024 yil yozida kuchga kirgan. Ommaviy axborot vositalari uni allaqachon «chet el agentlari qonuni» deb atagan. U ommaviy noroziliklarga qaramay ma’qullandi.

Yangi qonunning farqi shundaki, u oddiy fuqarolarga ham ta’sir qilishi mumkin. «Agar amaldagi «Oshkoralik to‘g‘risidagi qonun» faqat nodavlat tashkilotlar, onlayn OAV va teleradiokompaniyalarga tegishli bo‘lsa, Amerika qonuni jismoniy shaxslarga ham ta’sir qiladi. Jismoniy shaxs ham xorijiy kuch, ham agent bo‘lishi mumkin», — deya Gorduladze so‘zlarini keltiradi Gurjistonning Netgazeti portali.

Tbilisi life Telegram-kanalining qo‘shimcha qilishicha, «xorijiy agentlar» to‘g‘risidagi birinchi qonun qabul qilingandan so‘ng ko‘pchilik nodavlat notijorat tashkilotlari davlat reyestrida ro‘yxatdan o‘tishdan bosh tortgan. «Endi ular FARA asosidagi yangi qonunni joriy qilmoqda, u ro‘yxatdan o‘tishdan bosh tortgan taqdirda jinoiy javobgarlikni nazarda tutadi», — deb yozadi portal.