Toshkentda Parlamentlararo ittifoq ijroiya qo‘mitasi yig‘ilishi bo‘lib o‘tdi

Toshkentda Parlamentlararo ittifoq ijroiya qo‘mitasining tashkiliy masalalar yuzasidan yig‘ilishi bo‘lib o‘tdi. Yig‘ilishda Senat raisi Tanzila Norboyeva kirish so‘zi bilan ishtirok etdi.

Senat raisi o‘z nutqida PI rahbariyatiga, xususan, Ittifoq prezidenti Tuliya Ekson va bosh kotib Martin Chungong 150-yubiley assambleyani O‘zbekistonda o‘tkazishga rozilik bildirgani uchun minnatdorlik bildirdi. Ushbu tadbirning o‘tkazilishi mamlakatdagi demokratik islohotlarning xalqaro darajadagi e’tirofi ekani ta’kidlandi.

T.Norboyeva o‘z chiqishida ijtimoiy adolat, kambag‘allikka barham berish va zaif qatlamlarni himoya qilish masalalarining dolzarbligini qayd etib, bu borada parlamentlar o‘rtasidagi hamkorlikni kuchaytirish muhimligiga e’tibor qaratdi.

Shuningdek, O‘zbekiston parlamentining PI faoliyatidagi ishtiroki tobora faollashayotgani ta’kidlandi. Prezident Shavkat Mirziyoyevning “Barqaror rivojlanish maqsadlariga erishishni jadallashtirishda parlamentlarning rolini kuchaytirish to‘g‘risida”gi BMT Bosh assambleyasi rezolyutsiyasini qabul qilish haqidagi tashabbusi PI tomonidan to‘liq qo‘llab-quvvatlangani qayd etildi.

PI ijroiya qo‘mitasi faoliyati yuqori baholanib, uning parlamentlararo hamkorlikni mustahkamlashdagi muhim ahamiyatiga urg‘u berildi. PI bilan o‘zaro hamkorlik doirasida Buxoro va Toshkent shaharlarida xalqaro parlament forumlari hamda PIga a’zo davlatlar parlamentlari ayol rahbarlarining 14-sammiti muvaffaqiyatli o‘tkazilgani ham ta’kidlandi.