Qozog‘istonda pasporti olib qo‘yilgan fuqaro O‘zbekistonga qaytarildi

Bosh konsulxona ma’lumotiga ko‘ra, vatandosh R.N. Olmaota shahar ichki ishlar organlari tomonidan olib qo‘yilgan shaxsini tasdiqlovchi hujjatini olib berish va O‘zbekistonga qaytishi uchun amaliy yordam so‘rab murojaat qilgan.

Ma’lum bo‘lishicha, u Qozog‘istonga 2024 yil boshida ishlash maqsadida kelgan va qurilish sohasida vaqtincha ishga joylashgan. Ish beruvchi uning pasportini olib qo‘ygan va keyinchalik ro‘yxatdan o‘tkazish uchun migratsiya politsiyasiga topshirgan. R.N. 2024 yil sentabr oyida Olmaota shahri Naurizbay tumani Ichki ishlar boshqarmasi tomonidan mamlakatda bo‘lish qoidalarini buzish holati bo‘yicha ma’muriy javobgarlikka tortiladi. Shunga qaramay, u Qozog‘istonda noqonuniy mehnat faoliyati bilan shug‘ullanishda davom etgan.

O‘zbekiston Bosh konsulxonasi xodimlari sa’y-harakatlari bilan R.N.ning shaxsini tasdiqlovchi hujjatlari qaytarildi.

U "Olmaota-Toshkent" yo‘nalishidagi avtobus orqali O‘zbekistonga kuzatib qo‘yildi.