Braziliyada iqlim bo‘yicha o‘tkaziladigan sammitga tayyorgarlik ko‘rish uchun daraxtlar kesib tashlandi

Braziliyada Amazoniya tropik o‘rmonlarini kesish boshlandi. Bu Belen shahrini 2025 yil noyabr oyida o‘tkaziladigan COP30 iqlim sammiti o‘tkaziladigan joy bilan bog‘lovchi yo‘lni qurish uchun amalga oshirilmoqda, deb xabar beradi BBC.

Qayd etilishicha, sammitda ishtirok etish uchun 50 mingga yaqin odam tashrif buyuradi.

Rasmiylar yovvoyi hayvonlar uchun maxsus o‘tish yo‘laklarini tashkil etishni va’da qilgan bo‘lsada, ko‘plab mahalliy aholi va tabiat himoyachilari o‘z noroziliklarini bildirmoqda. Ularning hisoblashicha, o‘rmonni kesish iqlim o‘zgarishiga qarshi kurashga bag‘ishlanadigan sammit g‘oyasiga ziddir.

Loyihaga ko‘ra, yangi quriladigan yo‘l atrofiga daraxtlar ekiladi. Ayni vaqtda ekskavatorlar qo‘riqlanadigan maydon orqali o‘tadigan yo‘lni tayyorlash ishlari bilan shug‘ullanmoqda.

Klaudio Verekete ismli fuqaro yo‘l o‘tkaziladigan hududdan taxminan 200 metr uzoqlikda yashaydi. Oldinlari u daraxtlar mevasini terib, sotish orqali daromad qilgan. «Barchasi yo‘q qilindi. Endi oilani boqish uchun daromadimiz yo‘q», — deydi u.

Uning so‘zlariga ko‘ra, erkak shtat hukumatidan hech qanaqa kompensatsiya olmagan va ayni vaqtda g‘amlab qo‘ygan mablag‘lari hisobiga kun kechirmoqda.

Shtat hukumatining infratuzilma bo‘yicha vakili Adler Siveyra ushbu avtomagistralni COP30 doirasida o‘tkaziladigan tadbirlar uchun amalga oshiriladigan 30 ta loyihadan biri deb atadi. Uning aytishicha, yo‘l bo‘yida hayvonlar harakatlanishi uchun alohida o‘tish joylari, velosiped yo‘laklari va quyosh orqali yoritish tizimlari bo‘ladi.