Italiyada to‘liq sun’iy intellekt tomonidan yozilgan birinchi gazeta chop etildi

Italiyaning Il Foglio gazetasi sun’iy intellekt tomonidan to‘liq yaratilgan birinchi sonini chiqardi. Sun’iy intellekt (SI) gazetadagi barcha maqolalarni, ularning sarlavhalarini yozgan va hatto kinoyali izohlar ham qo‘shgan, deb yozadi The Guardian.

Il Foglio bosh muharriri Klaudio Cherasaning ta’kidlashicha, nashr sun’iy intellekt texnologiyalari zamonaviy jurnalistikani qanday o‘zgartirayotganini ko‘rsatish uchun ushbu tajribaga jur’at etgan. Il Foglio AI ning maxsus soni 18 mart kuni chiqqan. U to‘rt sahifadan iborat bo‘lib, gazetani ham bosma, ham onlayn shaklda o‘qish mumkin.

«Bu butunlay sun’iy intellekt tomonidan yaratilgan dunyodagi birinchi kundalik gazeta: maqolalar va sarlavhalardan tortib iqtiboslar va sharhlargacha,» — deydi Cherasa.

Muharrirning aytishicha, mazkur loyihada jurnalistlar faqatgina sun’iy intellektga savollar berish va javoblarni tekshirish bilan cheklangan. Uning so‘zlariga, neyrotarmoq grammatik xatolarsiz, sodda va tushunarli maqolalar yozgan. Bunda birorta materialda ham odamlarning to‘g‘ridan-to‘g‘ri iqtiboslari keltirilmagan. An’anaviy jurnalistikadan farqli o‘laroq, bu sonda shaxsiy fikrlar, chuqur tahlillar yoki jonli suhbatlar o‘rin olmagan.

Cherasaning fikricha, ushbu tajriba sun’iy intellekt yangiliklar yaratish jarayoniga qanday mos kelishi mumkinligini tushunishga yordam beradi.

Boshqa yirik nashrlar ham vazifalarni avtomatlashtirish va maqolalar tayyorlashda neyrotarmoqlardan foydalanayotganini tan olmoqda. Masalan, Associated Press axborot agentligi jurnalistlar uchun SI imkoniyatlaridan foydalanish bo‘yicha qo‘llanma ishlab chiqqan. Agentlik neyrotarmoqlar muharrirlarga sarlavhalar yoki maqolaga g‘oya tayyorlashda yordam berishiga umid qilmoqda.